Ferill þinn í skátastarfi?

Ég byrjaði í skátunum sirka 9 ára vegna þess að amma mín benti mér á að það var hoppukastali á kynningardegi skátafélagsins Hamars. Síðan þá hefur ekki verið hægt að slíta mig frá hoppinu og hí-inu í skátunum. Ég starfaði svo með skátafélaginu Fossbúum frá árinu 2007. Þar fékk ég mikla hvatningu og tækifæri til að spreyta mig í ýmsum verkefnum, byrjaði ung sem sveitaforingi og tók þannig þátt í uppbyggingu félagsins. Mig langaði að flytja í tjaldbúðina á Landsmóti skáta árið 2008 og búa þar að eilífu í skátaparadís, þar sem það var ekki möguleiki hef ég keppst um að komast á eins mörg skátamót og hægt er eftir það. Ég tók þátt í að skipuleggja útilegur og ferðir, tók þátt í foringjaþjálfunum og súrraði út í rauðan dauðann á sumardeginum fyrsta ár hvert. Ég sat í stjórn Fossbúa og gegndi stöðu aðstoðarfélagsforingja á árunum 2017-2019, þrátt fyrir að hafa flutt til Reykjavíkur í miðri stjórnarsetu.

Laugardalurinn heillaði og tóku Skjöldungar mér opnum örmum. Þar hef ég verið sveitaforingi fálkaskáta og áfram fengið tækifæri til að spreyta mig í nýjum verkefnum með góðan stuðning frá foringjum og stjórn félagsins. Ég starfaði sem skólastjóri Útilífsskóla Skjöldunga sumarið 2020 og tók þátt í uppbyggingu skátaskálans Hleiðru, sem er staðsettur í ævintýraveröld við Hafravatn. Ég tel mig tilheyra bæði Fossbúum og Skjöldungum og verð ævinlega þakklát fyrir öll tækifærin sem ég hef fengið hingað til og allan stuðninginn og hvatninguna sem foringjar mínir og vinir í félögunum hafa gefið mér gegnum árin.

Þegar ég kynntist skátastafi utan félags stækkaði heimurinn minn umtalsvert. Ég fór auðvitað að teygja angana í allar áttir og hef sinnt ýmsum verkefnum á vegum BÍS. Ég var mótsstjóri Drekaskátamóts frá 2017-2019, fararstjóri á Roverway í Hollandi árið 2018, Upplýsingastjóri Landsmóts skáta 2020 og starfaði á skrifstofu BÍS sem þjónustufulltrúi frá 2018-2019. Einnig tók ég vettvangsnám á BÍS við að skipuleggja Skátaþing árið 2018 sem hluta af námi mínu í viðburðastjórnun við Háskólann á Hólum.
Mér mun aldrei takast að gera tæmandi lista yfir allt það sem skátastarf hefur gefið mér og alla þá reynslu sem ég hef fengið í skátastarfi, en eitt er víst og það er að ég er skáti í húð og hár!

Skemmtilegasta sem þú hefur fengist við í skátunum?

Það skemmtilegasta sem ég geri í skátunum er að skipuleggja og framkvæma viðburði. Það sem mér finnst skemmtilegast við það er að kynnast nýju fólki, búa til tækifæri og upplifanir og verja tíma með frábæru fólki að fást við krefjandi og spennandi verkefni. Félagslífið er klárlega það sem mér þykir vænst um á mínum skátaferli og það er ómögulegt að velja afmarkaðan viðburð eða upplifun sem stendur sérstaklega uppúr.

Hví gefur þú kost á þér sem meðstjórnanda BÍS?

Ég gef kost á mér í stjórn BÍS vegna þess að ég hef brennandi áhuga á skátastarfi og vil helst verja öllum mínum stundum í að skátast. Mig langar að láta gott af mér leiða í þágu skátahreyfingarinnar og ég tel krafta mína nýtast best í stjórn BÍS. Ég hef mikla og fjölbreytta reynslu innan sem utan skáta og er mjög spennt að nýta hana í ýmis verkefni innan skátanna á næstu misserum. Mig langar að leggja áherslu á að auka viðburðahald og veita stuðning við skátaforingja og félögin og þannig leggja mitt af mörkum í uppbyggingu og framþróun skátastarfs á Íslandi.

Ferill þinn í skátastarfi?

Byrjaði sem ljósálfur í Vífli 9 ára gömul og var virk í starfi fram á unglingsár, almennur skáti og foringi. Hóf síðan störf aftur í Vífli 2007 sem foreldri og settist í stjórn. Var félagsforingi í átta ár. Starfa nú í baklandi félagsins, skálanefnd og húsnefnd.

Skemmtilegasta sem þú hefur fengist við í skátunum?

Skemmtilegast við skátastarf er að vinna með frábæru fólki og upplifa vöxt og þroska barna og ungmenna. Að vinna með skátunum og bakalndinu og styðja við starfið. Útilegur og Landsmótin standa upp úr bæði sem þátttakandi og baklandsliði.

Hví gefur þú kost á þér í uppstillinganefnd?

Ég vil leggja mitt af mörkum til þess að styðja við öflugt skátastarf. Að eiga þátt í því að velja úr fjölbreyttum leiðtogahópi skáta til forystu og trúnaðarstarfa innan hreyfingarinnar. Er þakklát fyrir að fá tækifæri til þess að gefa til baka með þakklæti fyrir minn vöst og þroska.

Ferill þinn í skátastarfi?

Ég hef verið í skátunum síðan ég var átta ára og hef verið í skátafélaginu Kópum síðan ég hóf starf. Frá og með 2016 hef ég unnið við foringjastörf í Kópum og var sveitarforingi fálkaskáta í nokkurn tíma en sé núna um dróttskátasveit Kópa ásamt öðrum. Ég hef einnig sinnt viðhaldi á skálum Kópa og þá aðallega Þristi sem ég hef verið að gera við og mála seinustu tvö sumur og stefni á að halda því áfram þar til hann er alveg kominn í lag. Öll þessi félgagsvinna ásamt öðru stuðlaði svo að lokum að því að mér var afhent forsetamerkið haustið 2021.

Skemmtilegasta sem þú hefur fengist við í skátunum?

Það skemmtilegasta sem ég hef fengist við í skátunum er ferð mín og róverflokksins míns til Hornstranda. Þessa ferð skipulögðum við sem fólst í matseðlagerð, skipulagningu á göngum og ýmsu fleira. Útiveran og samveran þar skapaði minningar sem munu vonandi aldrei gleymast.

Hví gefur þú kost á þér í útilífsráð?

Ég býð mig fram í útilífsráð því að ég vil að fleiri skátar fái að stunda skemmtilega útivist. Ég hef mikinn áhuga á útivist og tel að það sé hægt að fjölga viðburðum hjá BÍS sem leggja meiri áherslu á útivist. Markmið útilífsráðs verður að fjölga útivistaratburðum um að minnsta kosti 2 á ári næstu tvö árin.

Ferill þinn í skátastarfi?

Foreldrar mínir eru bæði skátar og því var það mér eðlislegt að verða skáti um leið aldur leyfði. Ég vígðist sem skáti 7 ára gömul í Svíþjóð og hef alla tíð síðan haft skátann í hjartanu. Þegar ég flyt heim frá Svíþjóð 1989 var það að sjálfsögðu það fyrsta sem ég gerði að finna mér skátafélag. Árin 2011-2018 starfaði ég í Skátamiðstöðinni og hef setið í Skólastjórn Skátaskólans/Gilwellskólans síðan. Ég er drekaskátaforingi í Mosverjum en einnig félagsforingi Mosverja.

Skemmtilegasta sem þú hefur fengist við í skátunum?

Drekaskátaforingjastörfin eru mesta áskorunin en einnig skemmtilegasta áskorunin í skátastarfi. Að hjálpa öðrum að læra að vera skátaforingi og leiðtogi er einnig uppáhalds.

Hví gefur þú kost á þér í Skátaskólan?

Ég tel að reynsla mín í fræðslumálum sem og foringjastörfum nýtist til að efla skátaskólann.

Ferill þinn í skátastarfi?

Kem úr skátafjölskyldu, var mikið sem lítið barn með afa og ömmu í Skjöldungum. Er samt Kópur, byrjaði sem „bleyjuskáti“, starfaði svo þar sem skáti frá 9 ára aldri, þar tóku við ýmis verkefni eins og að vera flokksforingi, sveitarforingi, í stjórn og farastjóri innan- og utanlands. Úlfljótsvatn mótaði mig svo á unglingsárunum og fram á fullorðinsár, en þar vann ég í unglingarvinnunni og vann svo nokkur sumur sem starfsmaður Sumarbúða skáta. Næstu stóru verkefni sem ég tók þátt í voru að koma að skipulagningu og framkvæmd á MOOT-Heimalandi og fara í farastjórn á WSJ 2019.

Skemmtilegasta sem þú hefur fengist við í skátunum?

Útilegurnar á unglingsárunum, tíminn á ÚSÚ, upplifa þakklætið, gleðina og ánægjuna af MOOT og WSJ með öllum skátunum.

Hví gefur þú kost á þér í starfsráð?

Áhugi á áframhaldandi vinnu í starfsráði eftir seinasta tímabil, mikilvægt að koma þeim verkefnum sem búið er að vinna að í framkvæmd og fylgja þeim eftir. Skátabúningurinn og dagskráramminn er þar ofalega í huga eins og staðan er núna í mars 2022.

Ferill þinn í skátastarfi?

Ég byrjaði í skátastarfi hjá Segli vorið 1990, gagngert til að fara á Landsmót um sumarið. Það var svo gaman á mótinu að ég hélt bara áfram að skátast og er hér enn! Ég sinnti öllum foringjastörfum í Segli, allt frá því að vera flokksforingi í að vera sveitarforingi og síðar í stjórn félagsins þar sem ég var meðstjórnandi, aðstoðarfélagsforingi og svo síðar félagsforingi. Jafnframt því var ég um tíma í fræðsluráði BÍS og svo síðar í dagskrárráði. Ég hef svo undanfarin tvö ár ca. setið sem meðstjórnandi í stjórn BÍS. Ég hef auk þess bæði leiðbeint og stýrt ótal námskeiðum og viðburðum, listinn er langur og fjölbreyttur, allt þó ákaflega skemmtilegt og spennandi, auðvitað!

Skemmtilegasta sem þú hefur fengist við í skátunum?

Þegar stórt er spurt! Það er svo margt, sveitar- og félagsútilegurnar í Segli, allar ferðirnar í Bæli með dróttskátasveitinni Yotoo, Jamboree 1995 með Haukdælasveit, Gilwell 1998, Gilwell Park 1999, öll námskeiðin auk allra landsmótanna sem og annarra minni móta, þar sem ný vinatengsl voru mynduð og gömul treyst. Ætli stutta svarið sé ekki bara upplifunin með frábærum félögum, það er það sem var, er og verður alltaf það skemmtilegast sem ég geri í skátunum!

Hví gefur þú kost á þér sem meðstjórnanda BÍS?

Einfalt, því ég tel að ég hafi eitthvað fram að færa og geti látið gott af mér leiða. Ég trúi því að skátastarf sé eitt það allra besta sem hefur komið fyrir mig og gert mig að því sem ég er í dag og ég vil hjálpa til við að leyfa öðrum að upplifa það sama.

Tvær nýjar reglugerðir vegna yfirstandandi heimsfaraldurs taka gildi 13. janúar, önnur um takmörkun á samkomum og hin um takmörkun á skólastarfi sem tekur m.a. til æskulýðs og tómstundastarfs þ.m.t. skátastarfs. Samkvæmt því getur félagsstarf skáta á grunnskólaaldri hafist aftur með nokkrum takmörkunum þó, félagsstarf rekkaskáta þarf áfram að fylgja almennum samkomutakmörkunum. Fjölskylduskátastarf getur farið fram ef fjöldi fullorðinna er undir 20 og þau fylgja reglum um almennar samkomutakmarkanir, leikskólabörn eru undanskilin nálægðar- og grímuskyldu.

Stjórnir skátafélaga eru samt hvattar til að taka mið af ástandi í þeirra nærsamfélagi og leita líka leiðbeininga frá sínum sveitarfélögum og hverfastjórnum ef þau vita að aðrar æskulýðsstofnanir í kringum þær hafa lokað vegna smita.

Þátttakendur:

• Drekaskátar, Fálkaskátar og Dróttskátar mega vera 50 saman á skátafundi
• Blöndun er leyfileg á milli hópa.

Staðsetning skátafunda:

• Mælst til að vera utandyra. Ef stór hluti er í sóttkví og/eða einangrun er mælst til að hafa fundinn á rafrænum vettvangi til að auka aðgengileika.
• Fari starf fram innanhúss skal gæta góðra þrifa á almennum snertiflötum og loftræsta rými.
• Áfram skal gæta persónubundinna smitvarna og bjóða góða aðstöðu til handþvotts og hafa spritt aðgengilegt þátttakendum og skátaforingjum.
• Ráðstafanir skulu gerðar til að sótthreinsa rými eftir hvern dag og á milli hópa í sama rými.

Skátaforingjar:

• Reyna skal að halda fjölda skátaforingja í lágmarki þó ávallt vera nægur til að anna ungmennunum og gæta öryggis, samkvæmt reglugerð má fjöldi skátaforingja að hámarki vera 20.
• Skátaforingjar skulu gæta 2 metra nálægðartakmörkunar á milli hvors annars og milli sín og barnanna eins og kostur er.
• Skátaforingjar skulu bera andlitsgrímur þegar ekki er unnt að gæta fjarlægðartakmarkanna og er mælst til þess að þær séu bornar öllum stundum í starfi.

Starfsfólk:

Séu starfsmenn í skátafélögum gilda sömu reglur um þau og skátaforingja.

Forráðamenn, aðstandendur og aðrir aðilar:

Ekki er sérstaklega talað um forráðafólk og aðstandendur þátttakenda í reglugerð en mælst er til þess að þau ásamt öðrum sem ekki tilheyra félagsstarfi hverrar skátasveitar skulu lágmarka viðveru í skátaheimili þegar skátafundir eru haldnir. Þau skulu bera grímu öllum stundum ef þau þurfa að mæta í persónu þar sem skátasveitin er að störfum og gæta nálægðartakmarkana gagnvart þátttakendum, skátaforingjum og öðrum.

Vilji skátar á þessum aldursbilum koma saman er þeim ráðlagt að færa allt það starf utandyra, vera aldrei fleiri en 20, gæta nándartakmarkana og bera grímur sé ekki hægt að tryggja þær. Áfram er mælst til að allar samkomur sem snúa að skipulagi félagsins s.s. foringjaráðsfundir, stjórnarfundir, baklandsfundir og samanbærilegt sé framkvæmt rafrænt.

Mælst er til þess að fara eingöngu í dagsferðir. Að svo stöddu er augljóslega meiri smithætta að fara og dvelja til lengri tíma saman í stórum hópi og erfitt að tryggja að sóttvarnartakmörkum sé fylgt í einu og öllu meðan á dvöl stendur.

Hér má finna tillögur að verkefnum sem hægt er að vinna að í í fjarfundum í ljósi samkomutakmarkana. Verkefnaflokkunum er skipt í tvo flokka, annarsvegar fjarfundar verkefni, sem er skipulagt fyrir foringja og skáta að vinna saman yfir í fjarfund á miðil eins og zoom eða teams, og hinsvegar eru heima verkefni, sem eru skipulögð fyrir foringja til að senda á skáta til að vinna sem einstaklingar eða litlit hópar.

Erindrekar vinna hörðum höndum við að finna og þróa verkefni til að setja hér inn. Ef þú ert með verkefni sem að hefur gengið vel í þínu starfi og vilt deila með öðrum sveitum er hægt að senda erindi á erindrekar@skatarnir.is.

Eftirfarandi verkefni eru skipulögð fyrir skátasveitir sem vilja halda netfundi á meðan samkomutakmarkanir koma í veg fyrir að við getum haldið fundi í persónu. Gott er að halda fundi á miðlum eins og Zoom eða Google Meet. Mikilvægt er að huga að jákvæðum samskiptum og netöryggi þegar kemur að netverkefnum.

Verkefni sem unnin voru fyrir STUÐKVÍ verkefnið sem fór fram 2021.