Taktu þátt í #GivingTuesday með skátum frá öllum heimshornum!

Væri það ekki frábært ef heimurinn kæmi saman í bara einn dag til að hjálpa öðrum og gefa til baka? #GivingTuesday snýst einmitt nákvæmlega um það! Dagur þar sem allir koma saman og gefa til baka í því formi sem þau vilja, eins og með því að gefa tíma sinn, rödd sína, hæfileikann sinn eða framlag sitt.  

Þetta er ástæðan fyrir því að WOSM (World Organisation of the Scout Movement) ætlar að taka höndum saman 1. desember nk. og hjálpa skátum út um allan heim að safna peningum fyrir málefni sem skipta þau máli með því að nota Scout Donation Platform. Frá því að berjast við Covid-19 til að leggja sitt af mörkunum við að ná heimsmarkmiðunum, hvort sem verkefnið er stórt eða smátt, þá getur það breytt heiminum. 

Hér eru 5 hugmyndir fyrir þig til að vinna að í tilefni #GivingTuesday:

1.Finndu samtök til að vinna með

Finndu málstað í þínu nágrenni sem þarfnast þinnar hjálpar. Það getur verið dýraathvarf, elliheimili, samtök sem hjálpa til við að plokka rusl í náttúrunni og ýmis fleiri málefni. Hringdu í samtökin til að fá betri skilning á þeirra þörfum og settu þér markmið fyrir hverju þú þarft að afla fjár.

2.Veldur þér eitt af heimsmarkmiðum Sameinuðu þjóðanna

Heimsmarkmið Sameinuðu þjóðanna eru frábær leið til að finna málefni sem skipta þig máli. Ef þú veist ekki hvar þú átt að byrja þá getur þú skoðað heimsmarkmiðin og valið þér eitt eða tvö markmið, borið kennsl á það sem þú getur framkvæmt í þínu samfélagi og skapað verkefnið þitt út frá því.

3.Nýttu þér þetta í vegferð þinni að merkjum og/eða viðurkenningum

Ertu að vinna að Forsetamerkinu, Messengers of Peace, Platic Tide Turners eða að öðrum merkjum? Hámarkaðu áhrif verkefnisins og safnaðu í sjóð til að láta verkefnið þitt verða að veruleika! 

4.Komdu af stað herferð

Finndu núverandi verkefni á Scout Donation Platform og vertu talsmaður þess, sem þýðir að í 24 klukkutíma þá talar þú fyrir málefninu og vekur athygli á því til að hjálpa til við að safna í sjóð verkefnisins! 

5.Finndu málefni fyrir sveitina þína / flokkinn þinn / skátafélagið þitt

Hver sagði að þú þyrftir að gera þetta ein/n/tt? Skipuleggðu heilabylju þar sem þú og skátahópurinn þinn leggið höfuðið í bleyti og finnið eitthvað sem þið hafið ástríðu fyrir (fáið skátaforingjann ykkar til að aðstoða þegar á þarf). Það geta verið hugmyndirnar sem voru nefndar hér að ofan eða þið getið fundið upp á nýju verkefni! 

Þegar þið eruð tilbúin með ykkar verkefni þá farið þið inn á Scout Donation Platform til að byrja! Þið getið skoðað heimasíðu #GivingTuesday fyrir innblástur og til að skoða önnur verkefni.

The Academy 2020

Rafrænn viðburður fyrir sjálfboðaliða og starfsfólk skátabandalaga í Evrópu

Íslendingar fjölmenntu á viðburðinn

Átta Íslendingar tóku þátt í viðburðinum, fimm sem þátttakendur, einn jafningjafræðari (e. peer group mentor) og tveir sem stjórnuðu smiðjum (e. facilitators). Auk þess var sýnt frá Kandersteg, sem er skátamiðstöð í Sviss, og þar áttum við Ísland líka fulltrúa sem tók þátt í að kveikja varðeld. Mjög skemmtilegt!

150 manns sungu saman Ging Gang Gullí Gullí á Zoom

Viðburðurinn gekk mjög vel og hélt hann sömu dagskrá og ef viðburðurinn hefði ekki verið haldinn á netinu. Sem dæmi var opnunarhátíðin á sínum stað þar sem 150 manns fjölmenntu á zoom fund og sungu saman. Alþjóðlega kvöldið stóð fyrir sínu þar sem löndum var skipt niður í herbergi í Zoom og gátu kynnt sín lönd; sumir elduðu þjóðarréttinn sinn, aðrir sungu saman og sumir kenndu hvort öðru dans! Íslenski hópurinn sýndi sýnar bestu hliðar og skellti í einn Daðadans, enn ekki hvað!

Ferðalagið heldur áfram

Academy lauk í ár á fallegu lokakvöldi þar sem við fórum yfir ferðalagið á Academy. Viðburðarteymið setti saman skemmtilegt myndband með svipmyndum viðburðarins (og mátti þar sjá glitta í Daðadansinn okkar Íslendinga, enn ekki hvað!) og var gaman að sjá hvað við gerðum mikið á þessum stutta tíma saman! Academy verður haldið í Þýskalandi á næsta ári og mælir hópurinn sem sótti það núna að allir sæki um að fara þangað!

Ferðalagið var stutt heim eftir þennan viðburð en bakpokinn þungur. Margar nýjar minningar, fjölbreyttur fróðleikur og nýir vinir er það sem við tökum með okkur heim í ár.

Takk fyrir okkur!

Tindaáskorun Mosverja

Skátafélagið Mosverjar hefur verið duglegt að senda út verkefni heim til skátanna sinna svo þau geti haldið áfram að vinna að merkjum heima en þeim finnst það mjög skemmtilegt. Mosverjum fannst vanta meiri útivist og datt í hug nýja áskorun. Útkoman var „Tindaáskorun Mosverja“ þar sem þau skora á alla að fara út og ganga a.m.k. einn tind!

Yfir 300 manns búin að taka áskoruninni

Orðið var fljótt að spyrjast út og eru nú yfir 300 manns komin í Facebook hópinn – Tindaáskorun Mosverja – og myndirnar strax farnar að hrannast inn! Áskorunin er til áramóta en allir sem taka þátt fara í lukkupott og þegar áskoruninni líkur verða tveir heppnir einstaklingar dregnir út og fá glaðning.

Svona tekur þú þátt:

• • Gengur einn tind
  • Tekur mynd sem sýnir staðsetningu eða gönguleið.
  • Deilir myndinni á Facebook hópnum – Tindaáskorun Mosverja. Einnig getur þú merkt myndina með #Tindaáskorun. Ef þú átt ekki Facebook síðu þá getur þú sent mynd og upplýsingar á mosverjar@mosverjar.is.
  • Nafnið þitt fer í lukkupottinn þegar þú sendir inn mynd af göngu á einn tind. Nafnið þitt fer jafnt oft í pottinn og tindarnir sem þú gengur. Ef þú gengur 5 tinda þá fer nafnið þitt 5 sinnum í pottinn.

Fálkaskátadagurinn 2020

Fálkaskátadagurinn var haldinn síðasta laugardag, 7. nóvember, og var Skátafélagið Vífill gestgjafinn að þessu sinni. Í staðinn fyrir að bjóða fálkaskátum í heimsókn eins og venjan er þá var fálkaskátadagurinn haldinn rafrænt í ár! Því setti Skátafélagið Vífill saman skemmtilegan þrautaleik sem var sendur út á fálkaskáta og skátafélög út um allt land. Þrautaleikurinn saman stóð af allskonar mismunandi verkefnum og með því að klára verkefnin fékkstu annað hvort 5 stig eða 10 stig.

Verkefnin

Skemmtilegast að rappa Rauðhettu og Úlfinn

Við heyrðum aðeins í tveimur fálkaskátum sem tóku þátt, þeim Alexöndru Kolku og Hönnu Lilju en þær eru í Skátafélaginu Klakki. Þær unnu stigakeppnina og sendu inn mjög skemmtileg myndbönd og myndir.

Súrruðu skýli

Hér má sjá mjög flott virki hjá þeim sem þær bjuggu sjálfar til! Vel gert!! En þeim fannst einmitt mjög skemmtilegt að súrra skýli og að rappa hið sívænsæla ævintýri um Rauðhettu og Úlfinn. Upprennandi listakonur hér á ferð.

Þær lærðu einnig að mæla fánastöng sem er eitthvað sem er gott að eiga í reynslubankanum sínum 🙂

BINGÓ!

Til að ljúka deginum hélt Vífill upp á rafrænt BINGÓ þar sem fálkaskátunum bauðst tækifæri á að „hitta“ aðra fálkaskáta og spila saman. Allskonar skemmtilegir vinningar voru í boði og dreifðust þeir út um allt land 🙂 Hér fyrir neðan má sjá 4 heppna sigurvegara, til hamingju!

Mikil gleði einkenni daginn og var gaman að sjá hvernig fálkaskátarnir leystu verkefnin á fjölbreyttan máta. Takk allir sem tóku þátt 🙂 Gaman að „sjá“ ykkur.

Takk Skátafélagið Vífill fyrir að standa fyrir svona flottum fálkaskátadegi og takk allir fálkaskátar sem tóku þátt! 🙂

Aðalfundur Bandalags íslenskra skáta, Skátaþing, fór fram um liðna helgi. Vegna yfirstandandi heimsfaraldurs og samkomutakmarkanna var Skátaþing haldið rafrænt í fyrsta sinn í sögu íslensku skátahreyfingarinnar og tóku allir þingfulltrúar, áheyrnarfulltrúar og meirihluti stjórnar BÍS þátt í þinginu gegnum fjarfundarbúnað.

Skátaþing var sent út úr Skátamiðstöðinni í Hraunbæ 123 þar sem 5 starfsmenn, 1 fundarstjóri, 3 fulltrúar stjórnar og 1 fundarritari stýrðu fundarsköpum og tæknimálum. Hópurinn gætti að sjálfsögðu fyllstu sóttvarna og dreifði sér um aðskilin rými um alla bygginguna.

Á Skátaþingi 2019 var lögum BÍS breytt og sætum í stjórn BÍS fækkað úr átta í sjö. íÍ stað þess að kjósa á hverju ári í viss embætti innan stjórnar til þriggja ára er stjórn nú kjörin öll á sama árinu og eingöngu til tveggja ára. Þá er er ekki kosið milli einstaklinga í hvert sæti heldur er skátahöfðingi kjörinn í sérstakri kosningu, gjaldkeri í sérstakri kosningu og síðan fimm meðstjórnendur kjörnir allir í einu í sérstakri kosningu.

Á rafrænu Skátaþingi 2020 var í fyrsta sinn kosningarár samkvæmt nýjum lögum en stjórnin var öll sjálfkjörin. Í stjórn BÍS sitja:

Marta Magnúsdóttir – Skátahöfðingi
Sævar Skaptason – Gjaldkeri
Ásgerður Magnúsdóttir – Meðstjórnandi
Björk Norðdahl – Meðstjórnandi
Harpa Ósk Valgeirsdóttir – Meðstjórnandi
Jón Halldór Jónasson – Meðstjórnandi
Þórhallur Helgason – Meðstjórnandi

Frekari upplýsingar um stjórn BÍS, verklagsreglur hennar og fundargerðir má finna á upplýsingasíðu stjórnar BÍS.

Á Skátaþingi 2019 var lögum breytt til að fækka fastaráðum innan Bandalags íslenskra skáta. Fastaráðin dagskrárráð, félagaráð, fjármálaráð, fræðsluráð og upplýsingaráð voru lögð af en skátaskólanum og starfsráði var bætt við. Þá var kjörnum sætum innan hvers ráðs fækkað úr fimm í þrjú. Þá eru fastaráð og aðrir kjörnir fulltrúar kjörnir til tveggja ára nú í stað eins árs áður.

Á rafrænu skátaþingi 2020 var sjálfkjörið í öll fastaráð og önnur embætti. Listi kjörinna fulltrúa er:

Þrír meðlimir í alþjóðaráð til tveggja ára

Daði Björnsson
Selma Sif Ísfeld Óskarsdóttir
Þórey Lovísa Sigurmundsdóttir

Þrír meðlimir í starfsráð til tveggja ára

Birta Ísafold Jónasdóttir
Páll Kristinn Stefánsson
Jóhanna Björg Másdóttir

Þrír meðlimir í stjórn Skátaskólans til tveggja ára

Dagbjört Brynjarsdóttir
Halldór Valberg Skúlason
Inga Jóna Þórisdóttir

Þrír meðlimir í ungmennaráð til tveggja ára

Ísold Vala Þorsteinsdóttir
Thelma Líf Sigurðardóttir
Úlfur Leó Hagalín

Fimm meðlimir í uppstillingarnefnd

Berglind Lilja Björnsdóttir
Birgir Ómarsson
Sædís Ósk Helgadóttir
Katrín Kemp Stefánsdóttir
Sigurður Viktor Úlfarsson

Þrír félagslegir skoðunarmenn til tveggja ára

Guðmundur Þór Pétursson
Kristín Birna Angantýsdóttir
Jón Þór Gunnarsson

Ný stefna BÍS til 2025 var samþykkt á skátaþingi en hún felur m.a. í sér að skátahreyfingin fjölgi skátafélögum á landsvísu um 5, að 25% atkvæða verði í hönum ungmenna á Skátaþingi fyrir lok 2025 og ýmislegt fleira. Áhugasöm geta kynnt sér stefnuna á nýrri upplýsingasíðu en þar má einnig sækja stefnuna á pdf formi.

Einnig var kosið um nafn á stefnu BÍS á skátaþingi. Stjórn BÍS hafði kallað eftir tillögum að nafni og barst fjöldi skemmtilegra nafna. Kosið var milli tillagna í tveimur lotum, eftir þá fyrri voru þær þrjár vinsælustu „Fyrirmynd til framtíðar“, „Stebbi“ og „Vísum veginn“ en í seinni lotu sigraði „Fyrirmynd til framtíðar“ með 50,91% atkvæða.

Töluverður fjöldi lagabreytingatillagna lá fyrir þinginu en alls höfðu 11 breytingar á lögum BÍS borist Skátamiðstöðinni eftir að Skátaþing var boðað í mars. Eingöngu tvær breytingar hlutu 2/3 hluta greiddra atkvæða eða meira og snéru báðar að 25. grein laga BÍS.

Fyrri lagabreytingin fól í sér að ungmennaráð verður héðan af kosið á Ungmennaþingi, þannig mun Ungmennaþing 2022 skipa ungmennaráð til 2024.

Seinni lagabreytingin fól í sér að stofnað skylda fimmta fastaráðið innan BÍS, svokallað útilífsráð. Hlutverk þess verður að hvetja til viðburða sem fela í sér útilíf og styðja við þá útilífsviðburði sem bæði skátafélög og BÍS standa fyrir.

Áhugasöm geta séð niðurstöður hinna kosninganna á upplýsingasíðu Skátaþings 2020.

Við stoppum ekki skátastarf -> Við færum það á netið!

Þegar Covid-19 byrjaði að færast aftur í aukana í seinustu viku var ákveðið að hvetja öll skátafélög til að færa starfið sitt á netið. Þetta átti sérstaklega við fyrir eldri skáta sem eiga flest auðvelt með að eiga samskipti við aðra á netinu. Ákveðið var að setja áherslu á rafræna viðburði fyrir drótt-, rekka- og róverskáta og tókum við það að okkur, við verandi Ásgerður og Kolbrún. Þetta hefur verið skemmtileg áskorun fyrir okkur og höfum við lært margt í ferlinu, t.d. vissum við ekki hvað Discord-server er.. en við vitum það svona sirka núna!

Rafrænir viðburðir

Mörg skátafélög hafa verið að nota Discord-servera sem vettvang fyrir skátafundi og var því ákveðið að nýta þann vettvang og búa til svæði fyrir drótt-, rekka- og róverskáta. Við vissum lítið um þennan server og fengum því góða hjálp frá skátum sem kunnu vel á forritið (skáti er svo sannarlega hjálpsamur! Takk!). 

Fyrsti viðburðurinn sem var haldinn var rafrænt spilakvöld. Við vissum í raun ekkert hversu mörgum við áttum að búast við og fór það fram úr öllum væntingum þar sem hátt í 60 skátar mættu, spjölluðu saman og spiluðu. Flestir fóru í leikinn Among us, sem svipar til Varúlfs sem margir þekkja úr skátastarfi. Skemmtilegur andi var yfir öllu og gaman hversu vel til tókst!

Nýir samfélagsmiðlar prófaðir

Við settum okkur í skó yngri kynslóðanna og þá var auðvitað ekki annað hægt en að skella í TikTok áskorun! Fyrsta áskorunin sem var sett fram er #klútaflipp og hvetjum við alla til að taka þátt! Við vekjum athygli á því að ekki þarf að eiga TikTok til að taka þátt, það má einfaldlega taka myndband og senda á Kolbrúnu 🙂 

Swisskviss

Auðvitað var svo skellt í skemmtilegar spurningakeppnir, önnur sem var sérstaklega beint að fjölskyldum og hin að drótt-, rekka- og róverskátum. Mætingin var mjög góð og einstaklega skemmtilegt að “hitta” svona marga skáta og eiga góða kvöldstund saman 🙂 Það mátti sjá kakóbolla hjá mörgum, gleðin var allsráðandi og miklar pælingar í gangi! Takk allir fyrir þátttökuna!

Höldum stuðinu gangandi

Framundan eru spennandi viðburðir og má til dæmis nefna Minecraft og PowerPoint kynningar. Fyrir ykkur sem finnst það ekki hljóma spennandi, þá mælum við með að fylgjast vel með því! Þetta verða sko ekki venjulegar PowerPoint kynningar…

Við látum ykkur vita hvað er í gangi á samfélagsmiðlum skátanna og hvetjum ykkur til að fylgjast með okkur þar! Skátarnir á Facebook, Instagram og TikTok! 

Hlökkum til að sjá ykkur á netinu á næstu dögum! Fylgist vel með hvað kemur næst!

Kveðja,
Ásgerður og Kolbrún