Kæru skátar

Nú í hádeginu var dregið um dagsetningar fyrir Skátasumarið á Úlfljótsvatni í sumar. Við byrjuðum á því að skipta félögunum upp í þrjá hópa, erindrekarnir voru okkur innan handar en þeir þekkja vel til félagana. Við fengum aðstoð frá hlutlausum aðila og drógum um dagsetningar. Við reyndum að gera þetta eftir okkar bestu getu.  Vonandi verða allir sáttir með úthlutunina og geta farið að skipuleggja sumarið.

Drekaskátar verða velkomnir á mótið og verður tekið sérstakt tillit til þeirra í dagskránni. Nánari upplýsingar munu berast á næstunni frá mótsstjórn sem vinnur að undirbúningi. Skátasumarið 2021 á Úlfljótsvatni verður mikið ævintýri fyrir skátana okkar. Það mun kosta 39.000 kr. Allur matur og dagskrá innifalið í verði. Við erum að skoða hvernig verður staðið að endurgreiðslu til þeirra sem voru búnir að greiða fullt gjald fyrir Landsmót 2020. Meira um það síðar.

Búið er að draga skátafélögin á dagsetningar. Það var gert hér í hádeginu af hlutlausum aðila.

7.- 11 júlí: Skjöldungar, Landnemar, Klakkur, Eilífsbúar, Vífill, Heiðabúar, Mosverjar og Faxi

14.-18. Júlí: Segull, Hafernir, Árbúar, Vogabúar, Hraunbúar, Fossbúar, Strókur og Örninn

21.-25. Júlí: Kópar, Svanir, Borgarnes, Akranes, Stígandi, Garðbúar og Ægisbúar

Sumarið 2021 verða haldin 3 skátamót á Úlfljótsvatni í stað hins almenna Landsmóts. Ástæðan er sú að þrátt fyrir að bóluefni verði komið til landsins þá teljum við óábyrgt að skipuleggja og halda svo stóran viðburð á Úlfljótsvatni á þessum tíma.

Hugmyndin er sú að skátafélögum verði skipt í 3 hópa og mæti þau með alla sína skáta á Úlfljótsvatn á 5 daga skátamót þar sem áherslan verður lögð á útilíf, tjaldbúðarlíf og heimsmarkmið Sameinuðu þjóðanna. Þannig væru um 100 þátttakendur á svæðinu á hverju móti.

Mikilvægt er að félögin mæti með sína ungu skáta á þessi mót því lítið hefur verið um útilegur í vetur og við vitum öll hversu mikið útilífið og útilegurnar gefa okkur.

Mótsstjórar

BÍS hefur fengið til liðs við sig þrjá öfluga mótsstjóra. Þetta eru ungir og öflugir skátar, sem muna nú sanka að sér fleiri skátum til að takast á við verkefnið. Mótsstjórnin mun fá aðstöðu í Skátamiðstöðinni til að vinna að verkefninu.

Rafnar Friðriksson
Ragnheiður Silja Kristjánsdóttir
Hrafnkell Úlfur Ragnarsson

Dagsetningar

7.-11. júlí
14.-18. júlí
21.-25. júlí

Mótssvæðið

Úlfljótsvatn er tilbúið að taka við þessum fjölda á skátamót án þess fara í uppbyggingu eða breytingar á svæðinu.

Tjaldsvæði fyrir almenning væri lokað á þessum tíma.

Matarmál

Farið verði til baka í matarúthlutun og skátafélögin sjái sjálf um morgunmat, hádegismat og kaffi. Mótið verði svo með kvöldmatin.

Súrefnismettaðir skátar á sterum

Vinnuhópur um aukið útilif skáta verður stofnaður í ársbyrjun 2021 og er það í samræmi við samþykkt sem gerð var á síðasta skátaþingi. Skátarnir vilja bjóða upp á metnaðarfullt og aðgengilegt dagskrárefni fyrir skáta sem byggt er á heildstæðum starfsgrunni með aukna áherslu á útiveru og verndun náttúru.

Viltu taka þátt?

Stjórn BÍS leitar að sjálfboðaliðum í vinnuhóp um aukið útilíf. Gert er ráð fyrir 3 – 5 manna hópi þar sem brennandi áhugi og/eða reynsla fá að njóta sín. Með vinnuhópnum verður tengiliður við stjórn og Skátamiðstöð. Tekið verður við umsóknum frá einstaklingum og teymum.

Láttu vita af þínum áhuga með pósti á veramemm@skatar.is fyrir 7. janúar. Nánari upplýsingar veitir Marta Magnúsdóttir skátahöfðingi.  Gjarnan má senda kynningarbréf þar sem líst er áhuga og reynslu þátttakanda. Á vef áttavitans eru hagnýt ráð hvernig kynningarbréf getur litið út – skoða fyrirmynd að kynningarbréfi.
Öllum umsóknum verður svarað.

Skuldbindingin sem þú brennur fyrir!

Þau sem senda umsókn skuldbinda sig til vinnu í hópnum frá 10. janúar 2021 og fram að Skátaþingi 2022, en þá verður kosið í útilífsráð.

Markmið vinnuhópsins eru:

• að hvetja til viðburða sem fela í sér útilíf og styðja við þá útilífsviðburði sem bæði skátafélög og BÍS standa fyrir.
• að stuðla að því að fyrir lok árs 2025 sé útivist enn ríkari partur af skátastarfi og að fræðsla, dagskrárefni og viðburðir taki mið af því.

Samfélagsleg verkefni skáta skiptir máli

Vinnuhópur um aukna samfélagsþátttöku skáta verður stofnaður í ársbyrjun 2021 og er það í samræmi við nýlega samþykkta stefnu skátahreyfingarinnar. „Markmið skátanna er að leggja sitt af mörkum til að stuðla að framförum í samfélaginu og að vera til fyrirmyndar þegar kemur að samfélagsþátttöku og umhverfisvernd,“ segir í stefnunni sem samþykkt var á skátaþingi í haust.

Viltu taka þátt?

Stjórn BÍS leitar að sjálfboðaliðum í vinnuhóp um samfélagsleg verkefni. Gert er ráð fyrir 3 – 5 manna hópi þar sem brennandi áhugi og/eða reynsla fá að njóta sín. Með vinnuhópnum verður tengiliður við stjórn og Skátamiðstöð. Tekið verður við umsóknum frá einstaklingum og teymum.

Láttu vita af þínum áhuga með pósti á veramemm@skatar.is fyrir 7.janúar. Nánari upplýsingar veitir Marta Magnúsdóttir skátahöfðingi.  Gjarnan má senda kynningarbréf þar sem líst er áhuga og reynslu þátttakanda. Á vef áttavitans eru hagnýt ráð hvernig kynningarbréf getur litið út – skoða fyrirmynd að kynningarbréfi.
Öllum umsóknum verður svarað.

Skuldbindingin sem þú brennur fyrir!

Þau sem senda umsókn skuldbinda sig til vinnu í hópnum frá 10. janúar – 15. maí 2021.

Vinna hópsins verður í samræmi við markmið stefnu BÍS, en eins og áður segir vilja skátarnir vera til fyrirmyndar þegar kemur að samfélagsþáttöku og umhverfisvernd. Í stefnunni segir einnig að  fyrir lok árs 2025 eigi samfélagsverkefni að vera sjálfsagður hluti af starfi flokka, sveita, félaga og BÍS. Verkefni vinnuhópsins er að leggja til aðgerðir til að þessi markmið náist.

Vinnuhópur skili af sér til stjórnar BÍS í síðasta lagi um miðjan maí 2021 heildarskipulagi fyrir verkefnið og hugmyndum að næstu skrefum varðandi framkvæmd þess. Gjarnan mega fylgja tillögur um fræðsluefni fyrir skátaforingja og skáta, sem og verkefnapakkar fyrir skátasveitir.