Landsmót verður á Úlfljótsvatni næsta sumar
Ákveðið hefur verið að halda landsmót skáta á Úlfljótsvatni næsta sumar- 14. – 21. júlí 2021.
Upphaflega átti að halda mótið í sumar en vegna fjöldatakmarkana vegna Covid-faraldursins féll það niður. Stefnt var á Akureyri sem mótsstað, en eftir að hafa metið heildarstöðuna ákvað stjórn Bandalags íslenskra skáta að færa mótið á Úlfljótsvatn og þar verður það haldið sumarið 2021.
„Við erum með mikinn búnað og góða aðstöðu á Úlfljótsvatni. Það var ekki auðvelt að taka þessa ákvörðun, en við teljum að það sé skynsamlegt í stöðunni eins og er,“ sagði Kristinn Ólafsson, framkvæmdastjóri Skátamiðstöðvar þegar hann kynnti málið á vel sóttum fjarfundi með félagsforingjum í gærkvöldi.
Ólöf Jónasdóttir, sem tók að sér stöðu mótsstjóra á liðnum vetri, þegar til stóða að halda mótið á Akureyri, tók undir orð Kristins um að það væri rétt ákvörðun að færa mótið á Úlfljótsvatn. „Við eigum að setja fókus á að halda Úlfljótsvatni gangandi,“ sagði hún. „Við hefðum auðvitað viljað halda mótið hér á Hömrum á Akureyri, en þetta er það skynsamasta í stöðunni.“
„Það er búið að vinna töluverða undirbúningsvinnu sem við munum skila til þeirra sem taka við mótinu,“ segir Ólöf sem nú lætur af störfum sem mótsstjóri. Félagsforingjar og stjórn BÍS þökkuðu Ólöfu fyrir hennar vinnu. Þema landsmótsins verður tengt heimsmarkmiðum sem skátar hafa hlúð að í sínu starfi, en einkunnarorð mótsins eru Byggjum betri heim.
Á næstunni verður leitað eftir nýju fólki til að koma inn í mótsstjórn. Kristinn er bjartsýnn á að það muni ganga vel. „Mögulega náum við að virkja á ný einhver þeirra sem tóku þátt í að skapa Moot heimsmótið sem haldið var á Úlfljótsvatni,“ segir hann og gerir ráð fyrir að næstu daga verði sent út opið kall eftir þeim sem vilja taka þátt í að halda Landsmót.
Nýr skátabúningur kominn í Skátabúðina
Skátabúðin er komin með í sölu nýja skátabúninginn. Peysur og boli sem eru óformlegri og þægilegri fatnaður heldur en skyrtan sem heldur áfram sínum sess sem hátíðarbúningur íslenskra skáta.
Peysurnar eru úr 85% lífrænni bómull og 15% endurunnu polyester, bolirnir eru úr 100% lífrænni bómull. Auk þess sem merkingin er unnin á vistvænan máta hjá Farvi ehf.
Auðvelt er að panta rétta stærð þar sem góðar stærðartöflur má finna í netverslun Skátabúðarinnar. Flíkurnar verða til mátunar í Skátabúðinni á næstu dögum og framleiddar eftir pöntunum. Einnig verður í boði að fá mátunarsett til láns í skátafélögin.
Verð:
Blá peysa barna: 5.800 kr.
Blá peysa fullorðins: 7.000 kr.
Appelsínugul peysa fullorðins: 8.600 kr.
Bolur barna: 2.600 kr.
Bolur fullorðins: 3.000 kr.
ATH: þessi verð gilda í 3 vikur ef gengi á evru fer ekki yfir 167 kr.
Pöntunareyðublað fyrir skátafélögin má finna hér.
Kjarkur, hugmyndaflug og samvinna
Vetrarstarf skátafélaganna er að hefjast þessa dagana fyrir börn og ungmenni á aldrinum 7 – 25 ára. Starfinu er aldursskipt og tekur mið af getu skátanna og byggir upp færni þeirra til framtíðar á fjölmörgum sviðum. Starfið eflir kjark, sjálfstæði, seiglu, útsjónarsemi og samvinnu.
Skátafélögin bjóða áhugasömu ungu fólki að kynna sér starfið og víða er mögulegt að líta við á fund án skuldbindingar. Á vefnum skatarnir.is eru greinargóðar lýsingar á inntaki skátastarfs og hvar finna má starfandi skátafélög ásamt þeirri dagskrá sem er í boði á hverjum stað.
Starfið yfir veturinn eru vikulegir skátafundir sem ýmist eru haldnir innan- eða utanhúss. Oft bætist við dagsferð um helgi og útilega. Þátttökugjöldum er stillt í hóf og taka sveitarfélög þátt í kostnaði með frístundastyrkjum.
Tvö skátafélög hafa boðið upp á nýjung sem kallast Fjölskylduskátun, en þá taka foreldrar þátt í starfinu með börnum yngri en 7 ára. Gjarnan er hist vikulega um helgar hluta úr degi eða með öðrum hætti sem hópurinn ákveður. Foreldrar þurfa ekki að hafa verið skátar og geta fengið leiðsögn frá skátamiðstöð.
Einnig eru starfandi hópar fullorðinna sjálfboðaliða í baklandi skátafélaganna og eru skátar og foreldrar hvattir til að skrá sig eða yfirfara eldri skráningar.
Covid-19 faraldurinn setti strik í reikninginn varðandi skátastarfið á liðnu vori sem féll niður um tíma. Skátar brugðu á það ráð að opna Stuðkví á netinu sem skátar og fleiri nýttu sér. Þegar takmörkunum var aflétt var boðið upp á starfið á ný og víðast hvar lengra fram á sumar en áður til að vinna upp glataðan tíma, enda skátarnir þyrstir eftir samveru og skátastarfi á nýjan leik. Komi til takmarkana í vetur munu skátar taka því af ábyrgð og festu með hagsmuni barna og ungmenna að leiðarljósi.
Leitað að nýjum alþjóðafulltrúa BÍS
Vegna breytinga er leitað að nýjum alþjóðafulltrúa Bandalags íslenskra skáta (BÍS). Fyrirvarinn er stuttur og verða þau sem hafa áhuga að láta vita af sér fyrir miðnætti 4. september. Fyrir þá sem hafa áhuga á alþjóðastarfi og samskiptum er hér óneitanlega spennandi tækifæri.
Alþjóðafulltrúarnir okkar eru tveir og að auki eru þrír í alþjóðaráði. Hópur vinnur þétt saman og hefur lagt góðan grunn fyrir starfið í vetur. Þær Þórey Lovísa Sigurmundsdóttir og Erika Eik tóku við stöðu alþjóðafulltrúanna í vor, en það er staða Eriku sem nú losnar. Erika er óvænt að fara á vit nýrra ævintýra í orðsins fyllstu merkingu því hún er að hefja bachelor nám í „adventure and outdoor education“ við Humak University of Applied Sciences. Það var vitað að þessi staða myndi mögulega koma upp þegar hún tók við stöðunni í vor og við óskum Eriku alls hins besta í náminu í Finnlandi.
Þórey Lovísa bíður ásamt öðrum í alþjóðaráði spennt eftir nýjum liðauka. Þau hafa lagt upp með áherslur í starfinu og þar kemur fram vilji þeirra að vera bæði sýnileg og virk á netinu sem og á vettvangi í skátastarfinu. „Við ætlum að senda einstaklinga út á ýmsa viðburði og koma heim með fræðandi efni“, segir í kynningu sem þau létu nýlega frá sér. Alþjóðaráð vill koma alþjóðastarfi meira inn í félögin og styðja þannig starfið með dagskrárpökkum og skemmtilegum verkefnum tengd alþjóðastarfi. „Okkar markmið er að gera íslenska skáta virka í alþjóðastarfi og fá Ísland til að vera virkt í alþjóðarhreyfingunum WOSM og WAGGGS, bæði með því að deila upplýsingum útávið sem innávið og þannig ná mestum árangri með góðum undirbúningi“.
Skipað verður í stöðuna til vors 2022. Erika hefur sem alþjóðafulltrúi verið með formlegar tengingar við kvenskátahreyfinguna (WAGGGS) og tæki nýr alþjóðafulltrúi við því hlutverki. Nánari upplýsingar fást hjá Eriku Eik og Mörtu Magnúsdóttur, skátahöfðingja.
Sjá einnig lýsingu á hlutverki alþjóðafulltrúa
Starfsmaður Skátafélags
Vilt þú taka þátt í frábæru vetrarstarfi fyrir ungmenni?
Starfsmaður Skátafélagsins ** - hlutastarf
Skátafélagið * óskar eftir öflugum einstaklingi í krefjandi og skemmtilegt starf starfsmanns skátafélagins. Skátafélagið er með fjölbreytt og spennandi starf fyrir börn á aldrinum 8-25 ára.
Helstu verkefni:
- Halda utan um skráningar
- Sjá um tölvupóst og halda utan um samskipti við foreldra
- Vera stuðningur við foringja
- Sjá um þrif einu sinni í viku
Hæfniskröfur:
- Vera með bílpróf
- Almenn tölvukunnátta
- Skipulagshæfni og sjálfstæði í vinnubrögðum
- Reynsla af stjórnun og mannaforráðum er kostur
- Reynsla af skátastarfi eða öðru æskulýðsstarfi er mikill kostur
Frekari upplýsingar veitir Jón Jónsson, félagsforingi skátafélagsins á jon@jon.is, s. 123-4567
Umsóknir skulu berast á skatafelag@skatafelag.is. Umsóknarfrestur er til 32. ágúst 2020.
Lokað vegna sumarleyfa
Skátamiðstöðin og Skátabúðin verða lokuð vegna sumarleyfa vikuna 27. -31. júlí. Opnum aftur eftir verlsunarmannahelgi.
Minnum á vefverslunina okkar skatabudin.is, pantanir sem berast verða sendar í póst eftir opnun.
Hægt er að senda okkur fyrirspurnir með tölvupósti á skatar@skatar.is, öllum fyrirspurnum verður svaraðeftir opnun.
Samskiptaráðgjafi
Samskiptaráðgjafi tók til starfa á vor mánuðum eftir að mennta- og menningarmálaráðuneytið setti lög um starfið síðastliðið haust. Samskiptaráðgjafi hefur það markmið að auka öryggi í íþrótta- og æskulýðsstarfi barna, ungmenna og fullorðinna. Markmiðið er að allir geti tekið virkan þátt á sínum vettvangi og jafnframt leitað sér aðstoðar eða leitað réttar síns vegna atvika og misgerða sem hafa átt sér stað án þess að óttast afleiðingar.
Þjónusta og ráðgjöf samskiptaráðgjafa stendur öllum þeim til boða sem tilheyra skipulögðu íþrótta- og æskulýðsstarfi á landinu. Til samskiptaráðgjafa er hægt að leita með mál sem varða andlegt, líkamlegt og kynferðislegt ofbeldi og áreitni, einelti og önnur sambærileg tilvik sem hafa farið fram á íþrótta- eða æskulýðsvettvangi. Einnig mun samskiptaráðgjafi koma á samræmdum viðbragðsáætlunum á landsvísu hvað slík mál varðar.
Starfi samskiptaráðgjafa sinnir Sigurbjörg Sigurpálsdóttir sem er klínískur sálfræðingur. Hægt er að hafa beint samband við hana, símatími er alla þriðjudaga kl.10-11 í síma 839-9100. Utan þess tíma er hægt að hringja í símanúmerið en ekki alltaf öruggt að ná samtali þá. Annars er hægt að senda tölvupóst á sigurbjorg@dmg.is sem verður svarað eins fljótt og hægt er. Einnig er hægt að leita til aðila innan síns félagsstarfs sem gæti svo haft samband við samskiptaráðgjafa fyrir hönd viðkomandi.
Eftir samtal eða fyrstu samskipti við samskiptaráðgjafa er boðið upp á viðtal ef málið varðar áreitni, ofbeldi eða einelti. Þá er frekari upplýsingum aflað og í kjölfarið yrðu næstu skref ákveðin, ávallt í samráði við þann sem leitar til samskiptaráðgjafa. Það er einnig hægt að leita eftir ráðgjöf hjá samskiptaráðgjafa, ekki þarf að fara lengra með mál ef viðkomandi kýs það ekki.
Samskiptaráðgjafi er óháður aðili sem getur aðstoðað og leiðbeint einstaklingum sem telja sig hafa verið beittir ofbeldi eða misrétti í sínu íþrótta- eða æskulýðsstarfi. Þjónusta samskiptaráðgjafa er gjaldfrjáls.
Nú hefur heimasíða samskiptaráðgjafa litið ljós og mun hún þjóna sem upplýsinga- og fræðslusíða starfsins. Einnig er hægt að setja sig í samband við samskiptaráðgjafa þar til að fá ráðgjöf eða aðrar upplýsingar.
https://www.samskiptaradgjafi.is/
Flakk og flandur - Útivistaráskorun skáta
Flakk og flandur
Útivistaráskorun skáta sumarið 2020
Sumarið 2020 verður útivistar- og ferðasumarið mikla! Þar sem ekki er mikið um utanlandsferðir í sumar er kjörið að nýta tækifærið og eyða tíma úti í náttúrunni okkar og prófa nýja hluti. Ungmennaráð Bís setti saman áskorun sem er beint að rekka- og róverskátum en öllum er velkomið að taka þátt. Til að taka þátt þarf að framkvæma áskorun, taka mynd og setja á samfélagsmiðla með myllumerkjunum #flakkogflandur og #skátarnir eða senda myndirnar á netfangið ungmennarad@skatar.is ef þið viljið ekki birta þær á netinu. Áskoranirnar eru miserfiðar og miserfitt að ná fullkláruðu verkefni á mynd en hér ætti að vera eitthvað fyrir alla og við treystum á að allir sýni heiðarleika við að klára einstakar áskoranir og senda þær inn. Allir sem klára a.m.k. fimm áskoranir fá þátttökuverðlaun og þau sem klára þær allar fá sérstaka viðurkenningu.
Gunni Atla er farinn heim
Kveðja frá skátahreyfingunni
Gunnar Atlason er farinn heim. Gunnar var sannur skáti, hann lét gott af sér leiða, var jákvæður með eindæmum, hjálpsamur og lífsglaður. Gunnar var átta ára gamall þegar skátaheimili Dalbúa opnaði fyrir aftan heimili hans og hann ákvað að byrja í skátunum. Hann sagði sjálfur að þar hafi hann kynnst skemmtilegum krökkum, og síðan þá haldið áfram að kynnast skemmtilegu fólki í skátastarfinu. Án efa hafði það áhrif á fólkið sem hann hitti að Gunnar var sjálfur mjög skemmtilegur maður. Um tíma leiddi Gunnar skátastarfið í Mosfellsbæ með eftirtektarverðum árangri og nú undanfarin ár var Gunnar forstöðumaður Fræðaseturs skáta og mun hans ötula og óeigingjarna starf fyrir Fræðasetrið verða minnst um ókomin ár. Á sama tíma og Gunnar vann að varðveislu og kynningu á sögu skátahreyfingarinnar á Íslandi, hvatti hann til nútímalegrar hugsunar í skátastarfi og hvatti fólk á öllum aldri til dáða og treysti þeim til góðra verka.
Þú ert skáti horfinn heim,
himinn, jörð, ber sorgarkeim.
Vinar saknar vinafjöld,
varðar þökkin ævikvöld.
Sérhver hefur minning mál,
við munum tjöld og varðeldsbál,
bjartan hug og brosin þín,
þau bera ljósið inn til mín.
Kveðjustundin helg og hlý,
hugum okkar ríkir í.
Skátaminning, skátaspor,
skilja eftir sól og vor.
H.Z.
Skátahreyfingin sendir ástvinum Gunnars og skátasystkinum einlægar samúðarkveðjur og minnist hans með miklu þakklæti.
Marta Magnúsdóttir, skátahöfðingi
Þeim sem vilja minnast Gunna bendum við á styrktarsíðu Skátasafnsins.
17. júní - Hæ hó jibbí jei
Hæ hó jibbí jei það er kominn 17.júní!
Á morgun er 17. júní, þjóðhátíðardagur Íslendinga. Í ár verða hátíðarhöldin þó með breyttu sniði en venjulega þar sem ekki er mælt með því að stór fjöldi safnist saman. Eru fjölskyldur hvattar til að halda hátíð heima, skreyta heimilin sín og nærumhverfið og fagna með sínum nánustu.
Skátar eru oft sýnilegir í hátíðarhöldum og er ekki mikil breyting í ár. Hægt verður að finna hressa skáta um allt land að bralla ýmislegt skemmtilegt! Við mælum með að þið kynnið ykkur dagskrána betur en hér er stiklað á stóru hvað skátafélögin eru að gera.
Klakkur á Akureyri sér um fánahyllingu, skrúðgöngu og einnig ætla þau að vera með tívolí þar sem hægt verður að prófa risatafl, frisbígolf og fleira skemmtilegt! Frekari upplýsingar hér.
Garðbúar í Bústaðarhverfi ætla að bjóða upp á hoppukastala fyrir framan skátaheimilið sitt. Frekari upplýsingar hér.
Fossbúar á Selfossi ætla að vera með ratleik um Selfoss Frekari upplýsingar hér.
Mosverjar í Mosfellsbæ bjóða upp á fjölskylduratleik um MosfellsbæS þar sem spennandi þrautir verða út um allt. Frekari upplýsingar hér.
Vífill í Garðabæ verður með Kanósiglingar við Ylströndina í Sjálandi og ratleik sem leiðir þátttakendur um bæinn. Auk þess munu þau standa heiðursvörð í Vídalínskirkju og selja snuð á meðan Eyþór Ingi syngur. Frekari upplýsingar hér.
Svanir á Álftanesi munu standa heiðursvörð í Safnaðarheimili Bessastaðasóknar og selja snuð á meðan Eyþór Ingi syngur í Álftanesi. Frekari upplýsingar hér.
Faxi í Vestmannaeyjum leiðir skrúðgöngu frá íþróttamiðstöðinni. Frekari upplýsingar hér.
Strókur í Hveragerði mun taka þátt í skrúðgöngu og sjá um skemmtilegan ratleik fyrir fjölskylduna. Frekari upplýsingar hér.
Stígandi í Dalabyggð verður með candy floss til sölu, eldstæði og pylsur á pinnum á túninu bakvið stjórnsýsluhúsið. Frekari upplýsingar hér.
Heiðabúar í Reykjanesbæ verða með skrúðgöngu, draga stærsta íslenska fánann að húni, leiða fjallkonuna og sjá um fánahyllingu fyrir fjallkonuna. Frekari upplýsingar hér.
Skátar úr Reykjavík standa heiðursvakt í morgunathöfninni á Austurvelli. Frekari upplýsingar hér.