Crean þátttakendur gengu frá sólarupprás til sólseturs

Á laugardaginn síðasta skunduðu af stað hressir skátar í fjallgöngu. Þetta var þriðja undirbúningsferðin í Crean Vetraráskoruninni ´23-´24. Í fyrri undirbúningsferðum hafa þau gengið að Hafravatni og einnig gengið um Hvaleyrarvatn.
Að þessu sinni var gengið frá Kjósinni upp á Trönu og þaðan yfir á Móskarðshnúka. Síðan lauk göngunni niðri við skátaskálann Þrist.

Þátttakendurnir byrjuðu gönguna á því að skoða bestu gönguleiðina á kortum og skipuleggja sig. Svo lagði hópurinn af stað við sólarupprás. Létt var yfir hópnum og öll í góðu skapi, skátarnir styttu sér stundir við gönguna með léttum orðaleikjum og spjalli á meðan þau nutu útsýnisins. Víðtækt landslag var í göngunni eins og tún, grjótaslóðar og sandsteinar en svo var einnig smávægis snjór og klaki á toppi Móskarðshnúka og Trönu. Þegar hópurinn var kominn að Móskarðshnúkum var sólin byrjuð að lækka á lofti og gengu þau niður hlíðina við sólsetrið.

Gangan tók um það bil 7 klukkustundir og gengið var 12.5 km. með 1.137m. hækkum.

Hópurinn byrjaði að elda sér verðskuldaðan kvöldmat þegar komið var niður af Móskarðshnúkum og svo var hugguleg kvöldstund með söng, eld í arninum og spjalli. Þau fóru sæl í háttinn bæði inni í Þrist og einnig úti í tjaldi. Haldið var heim á leið fyrir hádegi á sunnudegi.

by Sædís Ósk Helgadóttir

Jólaskógurinn rís í Skátamiðstöðinni

Sígrænu jólatrén eru komin í Skátamiðstöðina, Hraunbæ 123!

Opnunartímarnir fyrir jólatrén verða á hefðbundnum skirfstofutíma í nóvember frá 10-17 alla virka daga og frá 12-17 um helgar.

Í desember lengjast opnunartímarnir í 10-18 alla virka daga og frá 12-18 um helgar.

Verið er að vinna hörðum höndum að gerð nýrrar heimasíðu fyrir sígrænu jólatrén en í millitíðinni er hægt að senda fyrirspurnir á skatabudin@skatarnir.is eða mæta upp í Skátamiðstöð

by Sædís Ósk Helgadóttir

Norðurlandaskátar glímdu við fuglaflensu á Go Global

Helgina 6.-8. október komu saman 20 skátar frá Norðurlöndunum saman á stór- Kaupmannahafnar svæðinu í þeim tilgangi að kynnast þeim tækifærum sem sem standa til boða í alþjóðaskátastarfi á heismvísu.

Dagskrá helgarinnar var því með þeim hætti að auka vitneskju þátttakenda um WAGGGS og WOSM ásamt þeim verkefnum og tækifærum sem samtökin standa fyrir og þá var sérstök áhersla lög á að mynda sterk vinatengsl milli skáta á Norðurlöndunum.

Helgin byrjaði með öflugum póstaleik víðsvegar um Kaupmannahöfn þar sem þátttakendur sem skipt var í flokka og fóru um í leit að bæði dönskum sjálfboðaliða og erlendum frá bæði WOSM og WAGGGS og var reynt á vitneskju þátttakenda um heimsbandalögin.

Þá fóru þátttakendur á kynningu hjá Signe Marie Obel, sem nýlega var kjörin í heimsstjórn WAGGGS,  sem kynnti verkefnui WAGGGS og "Speak Out For Her World" verkfærakistuna um hvernig skuli tala fyrir málstað á alþjóðavísu.

í framhaldi af þessu kom Susanne Kolle fyrir hönd kvenskátaráðs danmerkur og hélt smiðju þar sem hún kynnti félagslegt nýsköpunarverkefni sem þau stýra.

Þegar kom að norræna kvöldinu, þar sem allir komu með besta snarlið frá sínum heimalöndum, komu skátar frá danska viðburðarteyminu KROPT og héldu óvæntan ævintýra-skáta næturleik sem kom öllum rækilega á óvart. Táknræn umgjörð leiksins var að skálinn, þar sem viðburðurinn fór fram, var skyndilega ógnað vegna skæðrar veiru. Þá kom ekki annað til greina en að veita starfsmönnum heilbrigðisstofnunarinnar hjálp við að stöðva útbreiðslu veirunnar og var því haldið út í skóg í leit að bóluefninu. Leikurinn var framkvæmdur þannig að upplifunin væri sem raunverulegust en þátttakendur þurftu m.a. að klæða sig upp í sóttvarnarbúning. Í gegnum leikinn fengu þátttakendur að kynnast þessari ævintýra-skátun sem er hefð hjá dönsku skátahreyfingunum en svo var líka sérstök kynning að leik loknum.

Eftir þennan stórkostlega viðburð eru þátttakendurnir nú spenntir að komast í kynni við ný alþjóðatækifæri og að vonandi þau muni öll hittast á norðurlanda ráðstefnunni í Færeyjum, Roverway eða í ævintýra-skátun í Danmörku.

Myndir í þessari frétt eru teknar af Margrethe Grønvold Friis.

Daði Már úr Árbúum og Signý Ósk frá Skjöldungum tóku þátt fyrir hönd BÍS.

by Sædís Ósk Helgadóttir

8 Rekkaskátar fengu forsetamerkið

Forsetamerkið var afhent átta ungmennum laugardaginn 7. október 2023 við fallega og skemmtilega athöfn á Bessastöðum.

Forsetamerkið er hvatamerki sem rekkaskátar, 16-18 ára, geta valið sér að vinna að samhliða starfi sínu. Í forsetamerkinu sameinast gildi skátahreyfingunnar um persónulegar framfarir einstaklingsins og þess að gera sitt besta samfélaginu til heilla. Vegferðin að forsetamerkinu er 2-3 ára verkefni sem hvetur skátanna til persónulegs vaxtar með því að skipuleggja, framkvæma og endurmeta 20 minni verkefni sem öll þurfa að falla undir ein fjögurra flokka,:

1. Heimurinn, ferðalög og alþjóðastarf
2. Útivist og útilífsáskoranir
3. Samfélagsþátttaka
4. Lífið, tilveran og menning

Auk þeirra verkefna þurfa öll sem vinna að forsetamerkinu að sækja 5 daga alþjóðlegt skátamót, ferðast 40 kílómetra á eigin afli, sækja helgarnámskeið í leiðtogaþjálfun og sækja 12 klukkustunda skyndihjálparnámskeið. Að lokum velja skátarnir sér 2 langtímaverkefni sem krefst virkrar þátttöku þeirra yfir 3-12 mánaða tímabil, dæmi um þetta er að vera foringi yngri skáta, taka þátt í skipulagi stórs skátamóts, sitja í stjórn félags, ráði eða vinnuhóp, að taka að sér viðhald skátaheimilis eða skátaheimili og margt fleira sem forsetismerkishafar hafa látið sér detta í hug.

Forsetamerkishafarnir 8 sem luku vegferðinni þetta árið eru úr 5 skátafélögum og bætast þar með í hóp 1446 forsetismerkishafa frá upphafi. Þau voru í röð númers forsetamerkis þeirra:

nr. 1439 - Davíð Þrastarson - Skátafélagið Garðbúar
nr. 1440 - Reynir Tómas Reynisson - Skátafélagið Garðbúar
nr. 1441 - Elías Dýrfjörð - Skátafélagið Klakkur
nr. 1442 - Franz Halldór Eydal - Skátafélagið Klakkur
nr. 1443 - Bengta Kristín Methúsalemsdóttir - Skátafélagið Mosverjar
nr. 1444 - Matthiludur Ósk Guðbjörnsdóttir - Skátafélagið Mosverjar
nr. 1445 - Valur Kári Óskarsson - Skátafélagið Skjöldungar
nr. 1446 - Dagur Sverrisson - Skátafélagið Ægisbúar

Við það tilefni bauð forsetaembættið rekkaskátunum og fjölskyldum þeirra til hátíðlegrar móttöku á Bessastöðum þar sem Guðni Th. Jóhannesson, forseti Íslands, afhenti þeim forsetamerkið. Við afhendinguna var samsöngur, tónlistaratriði flutt og Guðni ávarpaði samkomuna. Að lokum fluttu tvö úr hópi forsetamerkishafa stutta ræðu sem má horfa á í spilaranum hér að neðan:

https://youtu.be/jQ04MtQsZTY

Að lokinni afhendingu var haldið til Bessastaðastofu þar sem skátahöfðingi sagði nokkur orð áður en boðið var upp á veitingar.

Að lokinni athöfn var mótttaka fyrir forsetamerkishafa og gesti þeirra á Bessastaðastofu, að neðan má sjá myndir frá deginum.

by Sædís Ósk Helgadóttir

Nýr leikjavefur skátanna birtur!

Nýtt vefsvæði með leikjum hefur verið birt á heimasíðu Skátanna. En þar er nú hægt að finna safn skemmtilegra og frumlegra leikja sem líklegt þykir að skátar um allt land geti haft gaman af og hafa jafnvel ekki prófað áður.

Á vefnum er reynt að setja skemmtilega táknræna umgjörð í kringum hvern leik eða í hið minnsta gefa skátaforingan fróðleik til að kynna leikin með. Með því að nota þessi þemu er oft hægt að glæða leikina auknu lífi og gefa skátunum tækifærið á að setja sig í hlutverk áður en leikar hefjast.

Hvernig virkar nýr leikjavefur?

Vefurinn hefur hinar ýmsu síur til að auðvelda foringjum að finna leiki fyrir hvert tilefni fyrir sig. Leikir skiptast upp í hina ýmsu flokka s.s. flokkakeppnir, skátaklútaleiki, hópeflisleiki og söng- og hreyfileiki, þá er búið að flokka leiki eftir því hvaða aldursbilum þeir eru taldir henta best, hvaða umhverfi þeir henta best og svo er auðvitað hægt að leita eftir hópastærðum og tímaramma.

Á undirsíðu hvers leiks má svo finna sögu leiksins, hvað þarf fyrir leikinn, leiðbeiningar og hvernig má útfæra leikinn á annan máta til að umbreyta leiknum.

Þau sem lögðu hönd á plóg

Vefsvæðið hefur verið unnið í hlutum yfir langt tímabil og því hannað af breiðum hóp bæði fyrrum og starfandi erindreka Skátamiðstöðvarinnar þeim Kolbrúnu, Halldóri, Sigurgeiri og Sædísi. Benedikt Þorgilson hjálpaði svo við tæknilega uppsetningu bakenda og útliti hverrar leikjasíðu fyrir sig en Halldór Valberg setti upp yfirlitssíðuna þar sem hægt er að leita eftir leikjum.

Langar þig að leggja hönd á plóg?

Til að fagna nýjum leikjavef sem getur safnað saman og hýst skemmtilega leiki fyrir skáta viljum við efna til keppni og bjóðum glæsilegt vasaljós í verðlaun!

Ef þú kannt skemmtilegan leik hvetjum við þig til að senda leikinn inn í gegnum formið hér að neðan, þú getur sent miklu fleiri en einn leik og fyrir hvern leik sem er valinn frá þér inn á vefinn kemstu 1 sinni í pottinn. Í hvert sinn sem þú kemst í pottinn eykur þú lýkur þess að þú hreppir vinninginn. Við merkjum svo hvern leik þeim sem sendi hann inn og titlum viðkomandi sem höfund leiksins á leikjavef skátanna um aldur og ævi. Í tilfellum þar sem margir aðilar senda sama eða samskonar leik getur bæði gerst að eingöngu sá fyrsti sem sendi inn leikinn sé titlaður höfundur eða ef útfærslurnar eru ólíkar gæti Skátamiðstöðin sameinað hugmyndirnar á einhvern hátt og eru þá öll titluð sem höfundar.

Nafn leiks

Gott er að nafn leiksins sé lýsandi fyrir leikinn eða tengist sögunni í kringum leikinn.

Nafn höfundar

Skrifaðu nafn þitt í þennan reit til að vera höfundur leiksins í leikjabanka skátanna

Lágmarksfjöldi

Sá fjöldi sem þarf til að leikurinn gangi upp og sé skemmtilegur

Hámarksfjöldi

Sá fjöldi sem raunhæft er að geti að hámarki tekið þátt þannig að leikurinn gangi upp, sé skemmtilegur og hægt sé að stýra/hafa umsjón með í leiknum án þess að það verði ringulreið

Lágmarks tími í mínútum

Sá tími sem þarf almennt að lágmarki til að fara í eina umferð af leiknum. Má setja 0 fyrir leiki sem eru á bilinu 0-5 mínútur.

Hámarks tími í mínútum

Skynsamlegur tími sem má ætla að hægt sé að spila leikinn að hámarki áður en þátttakendur verða þreyttir á honum.

Fyrir hvaða aldursbil hentar leikurinn

• Drekaskáta
• Fálkaskáta
• Dróttskáta
• Rekkaskáta
• Róverskátar

Hér er ætlast til að höfundur leggi mat á hvaða aldursbilum leikurinn hentar út frá viðfangsefni, erfiðleikastigi, getu þátttakenda á ólíkum aldri og hversu spennandi eða krefjandi hann er fyrir þátttakendur á ólíkum aldri. Gott dæmi er að öll aldursbil geta farið í stórfiskaleik en það er kannski samt ekki jafn spennandi leikur að fara í fyrir þau sem eldri eru. Eins geta leikir með þungri og jafnvel alvarlegri umgjörð eða miklum hasar þar sem fólk þarf að hafa skyn fyrir mörkum annarra verið hentugri fyrir eldri aldursbil en þau yngri.

Skilgreiningar á hinum ólíku flokkum

Eftirfarandi er betri skilgreining á hinum ólíku leikjaflokkum til að einfalda svar við næstu spurningu.

Boltaleikir: Leikir sem nota bolta með einum eða öðrum hætti.

Eltingaleikir: Leikir sem ganga með einum eða öðrum hætti út á að einhverjir elta og aðrir eru að forðast þau.

Flokkakeppnir: Leikir sem auðveldlega má leika í uppskiptum flokkum innan skátasveitarinnar þar sem flokkarnir etja kappi við hvorn annan um sigur.

Hasarleikir: Leikir sem krefjast eða skapa með einum eða öðrum hætti mikinn hasar t.d. leikir með miklum hávaða, mikilli hreyfingu alls hópsins og þar sem gott er að hafa í huga að áhætta sé á árekstrum í.

Hópeflisleikir: Leikir sem eru til þess fallnir að styrkja liðsheild hópa og/eða þjálfa samskipti og samvinnu í hóp.

Ísbrjótar: Leikir sem geta verið góðir til að brjóta ísinn meðal hópa sem þekkjast kannski ekki innbyrgðis. T.d. leikir þar sem fólk lærir nöfnin á hvort öðru eða kynnist betur, leikir sem skapa auðveldlega stuð á meðal leikmanna jafnvel ef fólk í hópnum er feimið.

Kappsleikir: Leikir þar sem þátttakendur etja kappi hvort við annað.

Kimsleikir: Leikir sem reyna á og þjálfa skyn skyn fólks fyrir og minni fyrir smáatriðum. Í Skátahreyfingunni nefnir Baden Powell slíka leiki Kimsleiki sem vísan í sögupersónu Kiplings. Nafnið er því notað af skátum um allan heim fyrir slíka leiki.

Klútaleikir: Leikir sem krefjast þess að þátttakendur nýti skátaklútinn með einhverjum hætti sem skátaforingjar notað reglulega til að hvetja skáta til að mæta með klútinn sinn á fundi.

Kynningarleikir: Leikir sem hafa þann tilgang að þátttakendur kynnist hvor öðrum betur með einhverjum

Lýðræðisleikir: Leikir sem hægt er að nota til að stýra umræðum og vali milli ólíkra valkosta með ungum skátum og stuðla að því að einstaklingar taki sjálfstæðar ákvarðanir fremur en að þau byggi val skoðun sína og val sitt á einhverjum öðrum eða láti stýrast af hópnum.

Næturleikir: Leikir sem ætlaðir eru sem næturleikir í útilegum.

Orðaleikir: Leikir sem fara að mestu framm munnlega eða skriflega og/eða byggja á orðum, skilning á þeim og örva málvöxt.

Spunaleikir: Leikir sem reyna á ímyndunarafl og/eða að þátttakendur beiti spuna í þátttöku sinni.

Stóla-/sætaleikir: Leikir sem byggja á því að þátttakendur eru í stólum eða öðrum tegundum sæta í gegnum leikinn.

Stórleikir: Leikir sem ganga upp í stærri hópum fyrir 50 og fleiri.

Söng- og hreyfileikir: Leikir þar sem skemmtunin er fólgin í söng eða ákveðnum hreyfingum sem þáttakendur gera saman eða herma eftir stjórnanda.

Traustleikir: Leikir sem reiða á að þátttakendur treysti á hvort annað til að ná settu markmiði.

Þrautaleikir: Leikir sem byggja á þrautum og lausn þeirra.

Hvað flokk/um tilheyrir leikurinn?

• Boltaleikir
• Eltingaleikir
• Flokkakeppnir
• Hasarleikir
• Hópeflisleikir
• Ísbrjótar
• Kappsleikir
• Kimsleikir
• Klútaleikir
• Kynningarleikir
• Lýðræðisleikir
• Næturleikir
• Orðaleikir
• Spunaleikir
• Stóla-/sætaleikir
• Stórleikir
• Söng og hreyfileikir
• Traustleikir
• Þrautaleikir

Merkið við allt sem við á, sjá skilgreiningar hér að ofan

Hvaða umhverfi hentar leiknum best?

• Innileikir
• Útileikir
• Farartækjaleikir

Flesta leiki er hægt að fara í á öllum þremur stöðunum með góðum vilja. Hér biðjum við ykkur að merkja bara innileikir ef leikurinn krefst þess einhverra hluta vegna að hann fari fram innandyra.

Hvað þarf fyrir leikinn

Hér er óskað eftir upplýsingum um allan efnivið, dagskrárefnið og annað sem þarf til að láta leikinn ganga upp.

Saga

Leikir eru gerðir skemmtilegri með táknrænni umgjörð, einhverri sögu sem skýrir af hverju skátarnir eru að fara að fást við það sem framundan er og reyna að ná þeim markmiðum sem leikurinn krefst af þeim. Þetta getur líka gert það auðveldara fyrir mörg að lifa sig inn í leikinn því þau geta séð fyrir sér persónu, hlut, dýr eða annað sem þau eru að leika eftir. Ef þú þekkir enga sögu í kringum leikinn hvetjum við þig að nota ímyndunaraflið en annars getur þú skilið reitinn eftir auðan og leyft Skátamiðstöðinni að skálda í eyðuna.

Leiðbeiningar

Setjið fram leiðbeiningar í skýru máli, skýrið öll atriði sem þarf að skýra til að aðrir geti leikið leikinn eftir.

Útfærslur

Það er alltaf hægt að breyta litlum smáatriðum í leikjum og skapa þannig nánast nýjan stórskemmtilegan leik. Iðulega má breyta reglum um hreyfingar, sjón, samskipti, endamarkmið, fjölga og fækka ólíkum hlutverkum,

Eitthvað sem þarf að hafa í huga

Er eitthvað sem er gott fyrir leikjastjórnanda að huga að s.s. áskorun í samskiptum, áhætta á árekstrum, eitthvað sem er gott að viðkomandi viti en þátttakendur mega ekki vita, eitthvað annað?

Submit

by Sædís Ósk Helgadóttir

Fálkaskátaforingjar köfuðu ofan í könnuðarmerkjabók

Hringborð fálkaskátaforingja fór fram í Skátamiðstöðinni þriðjudaginn 19. september en hringborðin eru vettvangur fyrir sjálfboðaliða um land allt í samskonar hlutverkum að kynnast innbyrðis, ræða sín á milli þær áskoranir sem þau mæta í sínu starfi og deila á milli sín lausnum og góðum aðferðum.

19 skátaforingjar fálkaskáta úr 10 skátafélögum, þar af 3 sem tóku virkan þátt úr 2 skátafélögum utan af landi, mættu að hringborðinu og fór fram skemmtileg umræða um hin ýmsu málefni. Mestum tíma var varið í umræður um nýju könnuðarmerkin sem ætluð eru elstu fálkaskátunum, hvaða kröfur liggja að baki merkinu og hvernig sé best að leiðbeina hópi fálkaskáta á sinni vegferð að því. Þá sköpuðust afar gagnlegar umræður um praktísk atriði á hlið skátaforingjanna. Þá var einnig rætt um nýju stiku- og hæðarmerkin sem ætlað eru að styðja við aukna útivist í skátastarfi meðal yngri aldursbilanna jafnt sem þeirra eldri. Þau eru svo ný af nálinni að skátaforingjar hafa enn ekki fengið tækifæri til að nýta þau en ljóst var að mikil ánægja var með að svona merki væru komin og öll hyggðust nýta þau á komandi ári.

Kvöldið var líka nýtt til kynninga en Skátaskólinn kynnti tilboð til félaga um að koma með Fálkakraft dagskránna á vettvang félaganna og svo voru öll minnt á fálkaskátadaginn í nóvember og hvött til að fjölmenna.

Í opnum umræðum var rætt um mikilvægi þess að fara í útilegur og ferðir með fálkaskáta en ánægjulegt var að heyra að þau mál voru í lagi hjá öllum sveitum við hringborðið sem sum eru á leið í fystu útilegu ársins um komandi helgi. Flokkakerfið fékk sinn sess og hve gagnlegt sú umgjörð væri til að reka gott fálkaskátastarf, margir foringjar eru í fyrsta sinn að afla sér reynslu í að stýra slíku starfi og önnur á fundinum sem nota það ekki virtust sannfærast um að láta á það reyna líka í sínum sveitum sem lausn við vissum áskorunum í starfinu. Rætt var um mikilvægi þess að setja sér starfsáætlun sem væri síðan miðlað áfram til forráðafólks svo að skátaforingjar, skátarnir og forráðafólk þeirra væru öll með sömu væntingar til starfsins. Í lokin fengu foringjunum lampa með anda sem veitti þeim eina ósk um stuðningsefni sem myndi gagnast þeim í starfi og komu allskonar spennandi hugmyndir fram sem spennandi verður að skoða betur.

Hringborðin virðast sannarlega hafa markað sér sess en þetta er annað árið sem þessum vettvangi er haldið úti og því ánægjulegt að þau reynist eins fjölmenn og lífleg og raun ber vitni.

Næst er það hringborð dróttskátaforingja sunnudaginn 24. september og verður spennandi að sjá hvað kemur úr því.

by Sædís Ósk Helgadóttir