Skátamiðstöðin lokuð milli jóla og nýárs
Skátamiðstöðin verður lokuð frá 22. desember til 2. janúar.
Takmörkuð þjónusta verður milli jóla og nýárs en aðkallandi mál má senda á Framkvæmdastjóra BÍS
Starfsfólk skátamiðstöðvarinnar óskar ykkur gleðilegra jóla og farsæls komandi árs. 🌟
Ánægjukönnun sjálfboðaliða starfsárið 2023-2024
Eins og fram kemur í stefnu BÍS til ársins 2025 er eitt markmið Skátanna að sjálfboðaliðar hreyfingarinnar séu sátt. Skátarnir vilja veita fólki tækifæri á að taka þátt í uppbyggilegu sjálfboðaliðastarfi þar sem það nýtur sín í starfi, getur miðlað af reynslu sinni og fær tækifæri til að vaxa og dafna. Einn af mælikvörðum þess er að Skátamiðstöðin sendir frá sér ánægjukönnun til allra sjálfboðaliða tvisvar sinnum ári og niðurstöðum hennar verði fylgt eftir.
Því erum við núna að óska eftir svörum við ánægjukönnun fyrir skátaforingja og meðlimi stjórna skátafélaga starfsárið 2023-2024. Sendur hefur verið tengill á könnunina á alla sjálfboðaliða samkvæmt mannauðsskrá BÍS og biðjum við öll um að athuga tölvupóstinn sinn og svara könnuninni.
Nokkrir heppnir svarendur verða svo dregnir úr lukkupotti þann 15. desember og fá vinning úr Skátabúðinni.
Nýjar og breyttar reglugerðir stjórnar BÍS
Á árinu uppfærði stjórn BÍS nokkrar reglugerðir og samþykkti nýja sem talið var þörf fyrir og hafa þær nú verið birtar. Eins og 25. grein laga BÍS kveður á um getur stjórn BÍS sett reglugerðir um starfsemi innan BÍS og aðra þætti starfsins, eftir því sem þurfa þykir, efni þeirra skal rúmast innan laga BÍS og skulu þær kynntar aðildareiningum BÍS. Þær sem voru uppfærðar voru reglugerð um hæfi skátaforingja ásamt reglugerð um Landsmót skáta. Þá var samþykkt ný reglugerð um hæfi sjálfboðaliða.
Reglugerð um hæfi skátaforingja
Einhver mikilvægasta reglugerð skátastarfs var uppfærð lítillega til að ríma betur við samtímakröfur. Helstu atriði sem var breytt:
- Textinn gerður kynhlutlaus.
- Áréttað að félagseiningar skipa skátaforingja frekar en formenn stjórna þeirra.
- Tvítekning um lögræði skátaforingja tekin úr 2. grein
- Úrelt skilyrði fjarlægð m.a. um að einstaklingar skuli á sig komnir andlega að þeir séu færir um að gegna störfum tekið út og krafa um að einstaklingur hafi forræði yfir búi sínu sem hafi ekki verið til gjaldþrotaskipta sl. 2 ár.
- Skilyrði um færni uppfærð til að spegla kröfur um ráðningar ábyrgðaraðila fyrir æskulýðsstarf í Æskulýðslögum.
- Nákvæmara tungumál um hvaða brot það eru sem koma í veg fyrir að einstaklingur megi starfa í Æskulýðsstarfi samkvæmt lögum.
- Skilyrði um undirritun upplýsingaröflunar úr sakaskrá áréttuð.
- Setning um hvernig félagsforingi þurfi að afla leyfis BÍS til að taka við því embætti fjarlægð. Félagsforingjar sækja umboð til aðalfunds síns félags að því gefnu að þau uppfylli skilyrði í lögum BÍS um hlutverkið. Ekki talið endurspegla verklag í nútíma og ekki talið eiga heima í þessari reglugerð.
- Í þriðju grein hvatt til þess að skrifleg samkomulög séu gerð við skátaforingja í stað fyrra orðalags um að félög gæfu út skipunarbréf, til að endurspegla það verklag sem BÍS talar fyrir í dag.
- Í fjórðu grein áréttað að skátahreyfingunni sé skylt að vísa skátaforingja úr starfi ef þau gerast brotleg í því, í stað fyrra orðalags um að afturkalla skipunarbréf viðkomandi.
- Fimmta grein um hvernig veita megi undanþágu frá öðrum greinum reglugerðarinnar tekin út. Undanþágur skulu ekki veittar frá þessum kröfum.
Reglugerð um hæfi sjálfboðaliða
Þar sem reglugerðin um hæfi skátaforingja nær í raun eingöngu til þeirra sem leiðbeina í skátastarfi með börnum þá hefur samskonar reglugerð verið samþykkt af stjórn BÍS.
Reglugerð um Landsmót skáta
Talin var ástæða til að uppfæra reglugerð um landsmót og voru breytingarnar unnar í nánu samstarfi við skátafélagið Klakk. Breytingar fela í sér:
- Tilmælum um ólíka þátttöku mismunandi aldurshópa breytt. Í stað þess að hvetja gegn þátttöku yngri skáta er hvatt til hennar.
- Fest í reglugerð að mótið fari fram á Hömrum og Úlfljótsvatni á víxl í stað þess að stjórn sé falið að ákvarða staðsetningu í kjölfar ábendinga frá Skátaþingi.
- Grein um sérstaka undirbúningsnefnd og allar tilvísanir til hennar teknar úr reglugerð þar sem ekki hefur verið stuðst við slíka í langan tíma.
- Breytingar á ákvæðum um skipun mótstjórnar, fjármálastjóri BÍS sé héðan af fjármálastjóri mótsins og krafa um að minnst einn í mótstjórn sé af landsbyggðinni.
- Tímarammi í 3. grein styttur úr 18 mánuðum í 15. Einnig áréttað að mótstjórn skuli tryggður aðgangur að gögnum fyrri móta.
- Orðalag um fjármagn til mótstjórnar á undirbúningstíma gert opnara.
- Tímasetning Landsmóta skáta fest við miðjan júlí.
- Ný krafa sett um dagskrá sem hefur tengsl við heimsmarkmið sameinuðu þjóðana.
Reglugerðirnar eru samkvæmt skilyrðum 31. greinar laga BÍS ávallt aðgengilegar á sérstöku vefsvæði á heimasíðu skátanna ásamt öðrum gildandi reglugerðum.
Könnuðamerkin eru mætt!
Könnuðamerkin eru nýjung í skátastarfi sem byggja á forsetamerkinu. Merkin eru hvatakerfi fyrir skáta og veitir þeim endamarkmið til að vinna að á síðasta ári hvers aldursbils.
Dreka-, fálka-, og dróttskátar sem eru að ljúka sínu aldursbili fá tækifæri á því að gerast könnuðir. Sem könnuðir þurfa þau að vinna að sérstökum verkefnum yfir starfsárið og halda utan um þau í könnuðamerkjabókinni sinni.
Verkefnin eru allt frá því að vinna að færnimerkjum, fara í útilegur og skipuleggja gönguferð yfir í að vinna að verkefnum sem þau velja sjálf og vinna að með flokknum eða sveitinni sinni. Skátarnir vinna sjálf að þessum verkefnum en njóta stuðnings sveitarforingja sinna.
Könnuðamerkjabækurnar er hægt að kaupa í Skátabúðinni eða prenta út sjálf í skátaheimilinu.
Könnuðamerkin sjálf fást svo í Skátabúðinni.
Skátamiðstöðin lokuð 21. nóvember
Starfsfólk skátamiðstöðvarinnar er úti í dag á árlegum starfsmannadegi og er Skátamiðstöðin því lokuð.
Jólatrésalan er opin, verið velkomin í heimsókn í Hraunbæ 123.
Tölvupóstum verður svarað á miðvikudag. Ef erindið er mjög brýnt - vinsamlegast merkið það svo og við munum gera okkar besta að svara. Við afsökum óþægindin sem kunna verða vegna þessa.
Boð um aðstoð til Grindvíkinga
Skáti er hjálpsamur og mörg skátafélaganna vilja bjóða Grindvíkingum aðstoð ef á þarf að halda og hafa þegar auglýst eða látið Rauða krossinn vita af því. Í þeim hafsjó upplýsinga sem internetið getur verið er samantektin til að einfalda þeim sem þurfa að finna upplýsingar á einum stað. Athugið að samantektin tekur breytingum eftir því sem upplýsingar um fleiri boð berast og ef einhver úrræða eru nýtt þannig þau standa ekki lengur öðrum til boða.
SKÁTAFÉLAGIÐ GARÐBÚAR
Skátaheimili Garðbúa í Hólmgarði
Afnot af húsnæði
Skátafélagið Garðbúar bjóða Grindvíkingum sem vantar enn húsaskjól afnot af húsnæði félagsins að Hólmgarði 34, 108 Reykjavík. Einnig bjóðum við fram skátaskálann okkar Lækjarbotna undir hlíðum Selfjalls ofan við Heiðmörk, ca 14 km út fyrir bæjarmörk.
Skátaheimilið
Í húsnæði Garðbúa er einn stór salur sem tekur um 50 manneskjur. Inn af salnum er annað rými sem er hálfgerð setustofa og salerni með aðgengi fyrir fatlaða og sturta. Það eru 3 herbergi (föndur-, spila- og flokkaherbergi). Skátafélagið á töluvert magn af dýnum sem er velkomið að nota. Það er góð eldhúsaðstaða, tvö salerni eru við forstofu og lítið þvottahús. Skátaheimilið er staðsett í fjölbýli og þarf að taka tillit til nágranna okkar varðandi hávaða og ónæði. Lágmarka þarf hávaða eftir kl. 22:00. Ef fólk frá Grindavík vill einhverjar frekari upplýsingar um Skátaheimilið Garðbúa má hafa samband við Aldísi Líf í síma 848-6167 og netfangið gardbuar@gardbuar.com.
Lækjarbotnar
Lækjarbotnar, skátaskálinn er mjög rúmgóður og hann er á tveimur hæðum með anddyri, matsal og eldhús á neðri hæðinni. Í eldhúsinu er eldavél og bakaraofn svo er einnig gasgrill á staðnum. Á efri hæðinni er síðan svefnloft með rúmgóðum tveggja manna kojum þar sem 30 manns (fullorðnir) geta gist. Inn fyrir svefnloftið er síðan lítið “foringja”herbergi þar sem fjórir fullorðnir geta gist í kojum. Ef fólk frá Grindavík vill frekari upplýsingar um Lækjarbotna má hafa samband við Svavar í síma 896-6056 og netfangið svavar321@gmail.com.
Fyrirvari um neyslu áfengis/vímuefna og tóbaks
Í skátaheimilinu og Lækjarbotnum er neysla áfengis/vímuefna og tóbaks bönnuð.
SKÁTAFÉLAGIÐ HEIÐABÚAR
Skátaheimili Heiðabúa er staðsett á Hringbraut 101, 230 Reykjanesbæ
Nauðsynjasöfnun
Skátafélagið Heiðabúar opnaði skátafélagið sitt fyrir nauðsynjasöfnun fyrir Grindvíkinga. Hægt er að fylgjast með facebook síðu Heiðabúa fyrir nánari upplýsingar um hvar og hvenær er hægt að nálgast munina sem hafa safnast.
Frítt á skátafundi
Skátafélagið Heiðabúar bjóða Grindvíkingum frítt á skátafundi fram að jólafríi að minnsta kosti. Heiðabúar halda úti starfi fyrir börn frá 8-19 ára aldri. Fundartímanna má finna einnig finna á facebooksíðu félagsins hér.
SKÁTAFÉLAGIÐ HRAUNBÚAR
Frítt á skátafundi
Skátafélagið Hraunbúar í Hafnarfirði bjóða Grindvíkingum að mæta frítt á skátafundi fram að jólafríi skátastarfs í félaginu sem hefst 20. desember. Fundartíma má finna á www.hraunbuar.is/sveitirnar.
Lán á húsnæði til hýbílis
Hraunbúar opnuðu gistiheimilið sem við höfum í rekstri á sumrin fyrir Grindvíkinga. 5 herbergi eru til staðar sem verið er að nýta þessa stundina. Salurinn hefur verið innréttaður sem setustofu og matsalur fyrir þau sem dvelja á gistiheimilinu og tjaldsvæðinu.
Kostnaðarlaus dvöl fyrir húsbíla og hjólhýsi með aðgang að eldhúsi, sal og salerni.
Tjaldsvæðið á Víðistaðatúni er opið fyrir Grindvíkinga sem vilja dvelja í húsbílnum eða hjólhýsinu sínu sér að kostnaðarlausu. Þeir sem dvelja á tjaldsvæðinu hafa aðgang að eldhúsi, salnum og salerni í skátaheimlinu okkar.
Samverustund fyrir Grindvíkinga
Hraunbúar og St. Georgs gildið ætla að opna salinn fyrir Grindvíkingar þann 17 nóvember klukkan 16-20 og allir Grindvíkingar eru velkomnir að nýta sér það, til að koma saman og spjallað, fengið sér kaffi og með því. Börnin leikið sér í ótalmörgum spilum og dóti sem er í boði eða horft á sjónvarpið. Ef áhugi er fyrir því verður félagið með fleiri slíka viðburði.
Hafa samband við Hraunbúa
Ef fólk frá Grindavík vill einhverjar frekari upplýsingar má hafa samband við brynjar@hraunbuar.is og í síma 895-0906.
SKÁTAFÉLAGIÐ LANDNEMAR
Skátaheimili Landnema í Háuhlíð 9
Frítt á skátafundi fyrir unglinga
Skátafélagið Landnemar bjóða Grindvíkingum á aldrinum 13-15 ára að mæta frítt á skátafundi fram að jólafríi skátastarfs í félaginu sem hefst 13. desember. Fundartímar eru á fimmtudögum frá 17:45-19:45 í Háuhlíð 9. Því miður er fullt og ekki mannskapur til að taka á móti fleirum á öðrum aldursbilum.
Afnot af húsnæði fyrir einstaklinga eða skipulagða starfsemi
Þeim sem vantar enn húsaskjól geta fengið afnot af húsnæði félagsins en í húsinu eru dýnur til afnota. Í húsnæðinu eru fimm lítil herbergi, salur, fjögur baðherbergi og eldhús. Í garðinum er frábært útisvæði og hefur húsið verið nýtt í fortíð sem frístundaheimili. Húsið er tilvalið til að nýta í samkomur eða aðra skipulagða starfsemi á dagtíma.
Ef fólk frá Grindavík vill einhverjar frekari upplýsingar má hafa samband með tölvupósti í landnemi@landnemi.is.
SKÁTAFÉLAGIÐ KÓPAR
Skátaheimili Kópa á Digranesvegi
Frítt á skátafundi
Skátafélagið Kópar bjóða Grindvíkingum frítt á skátafundi fram að jólafríi að minnstakosti sem hefst 19.desember með kvöldvöku það kvöld. Kópar halda úti starfi fyrir börn frá 8-19 ára aldri. Fundartímanna má finna á kopar.is
Afnot yfir daginn af húsnæði fyrir barnastarf eða aðra starfsemi
Skátafélagið Kópar tilbúið að bjóða fram húsnæðið sitt til afnota fyrir starfsemi á daginn svo sem leik- og grunnskóla eða aðra starfsemi sem er á daginn. Húsnæðið er rúmgott og bjart með mörgum herbergjum, mjög vel útbúnu eldhúsi og veislusal sem rúmar tugi manns í sitjandi borðhaldi. Ef fólk vill frekari upplýsingar þá er hægt að hafa samband við félagsforingjann Heiðu Hrönn með að senda póst á heidahronn@kopar.is eða í síma 693-8042.
SKÁTAFÉLAGIÐ STRÓKUR
Staðsett í Breiðumörk 22, 810 Hveragerði, Netfang: skatafelagidstrokur@gmail.com
Nauðsynjasöfnun
Skátafélagið Stókur opnaði skátafélagið sitt fyrir nauðsynjasöfnun fyrir Grindvíkinga. Hægt er að fylgjast með facebook aðgangi Stróks hér fyrir frekari upplýsingar um hvernig hægt sé að nálgast söfnunina.
SKÁTAFÉLAGIÐ VÍFLAR
Húsnæði skátafélagsins Vífils og Hjálparsveit skáta í Garðabæ.
Frítt á skátafundi
Vífill býður ungmennum frítt á skátafundi fram að jólafríi, félagið heldur úti starfi fyrir börn og ungmenni 7-19 ára. Hægt er að finna upplýsingar á vifill.is.
SKÁTAFÉLAGIÐ VOGABÚAR
Skátaheimili Vogabúa í Logafoldi
Skátafélagið Vogabúar hefur opnað skátaheimilið sitt fyrir Grindvíkingum og hefur fólki þegar verið komið fyrir í því.
ÚTILÍFSMIÐSTÖÐ SKÁTA Á ÚLFLJÓTSVATNI
Aðstaða skátanna á Úlfljótsvatni
Lán á aðstöðu:
Útilífsmiðstöð skáta býður Grindvíkingum og stjórnvöldum afnot af svæði Skátamiðstöðvarinnar á Úlfljótsvatni. Boðin eru 60 gistirými, sameiginleg eldhúsaðstaða, matssalur og salur ásamt þeirrar náttúru og leiksvæða sem svæðið hefur uppá að bjóða. Útilífsmiðstöðin er staðsett við Úlfljótsvatn og má skoða betur á ulfljotsvatn.is. Taka má fram að einnig er hægt að fullnýta aðstöðuna fyrir leikskóla/skóla árgang. Ef fólk frá Grindavík og/eða stjórnvöld/bæjarfélag Grindavíkur vill frekari upplýsingar má hafa samband við Ragnar í síma 869-7817 og netfangið ragnar@skatarnir.is
Íslenskir skátar fordæma stríðsrekstur á Gaza
Bandalag íslenskra skáta skorar á íslensk stjórnvöld að fordæma allan stríðsrekstur á Gaza og kalla eftir tafarlausu vopnahléi af mannúðaraðstæðum. Skátar eru skelfingu lostnir yfir þeim hörmulegu aðstæðum sem ríkja nú á Gaza og því gífurlega manntjón sem þar hefur orðið. Yfir 11.000 hafa þegar týnt lífi, þar á meðal þúsundir barna og tala látinna á eftir að hækka.
Skátarnir eru stærsta friðarhreyfing heimsins og fordæma allt ofbeldi. Við hvetjum þjóðir heims til að gera allt sem í þeirra valdi stendur til að binda enda á öll stríðsátök og tryggja öryggi óbreyttra borgara.
www.unwomen.is
www.unicef.is
www.amnesty.is
Hæða- og Stikumerkjavefurinn uppfærður
Hugmyndir að gönguleiðum fyrir hæða- og stikumerki komnar inn í Verkfærakistu BÍS
Við erum búin að uppfæra vefinn fyrir hæða- og stikumerkin með listum yfir gönguleiðir víðsvegar um landið. Það er mikið úrval af gönguleiðum fyrir hvert merki og eru leiðirnar flokkaðar eftir bæði hæð og lengd svo það er þægilegt að finna þá gönguleið sem hentar best fyrir hvert merki. Það er líka hægt að smella á sumar gönguleiðir til að fá nánari lýsingar á gönguleiðunum.
Vefinn er að finna undir „Verkfærakista“ – „Ferðir og Útilegur“ – „Hæða og stikumerki“. Einnig er hægt að smella hér.
Hugmyndabankinn er í stöðugri þróun svo við hvetjum öll sem fara í ferðir til að segja okkur frá þeim. Ef þú ert með hugmyndir um ferðir sem hægt er að fara til að vinna að merkjunum má senda þær á skatarnir@skatarnir.is.
Vegna heimildarmyndar Netflix um Boy Scouts of America (BSA)
BÍS (Bandalag íslenskra skáta) fordæmir viðbrögð stjórnenda BSA og allan málarekstur þess í tengslum við þau brot sem myndin fjallar um.
BÍS vill einnig árétta að þrátt fyrir að þau séu samstarfsaðilar BSA í alheimsbandalagi skáta (WOSM) þá er laga- og regluverk bandalaganna gjörólík auk þess sem sögur þeirra, hefðir og gildi séu ekki þau sömu.
Það að tryggja öryggi barna og ungmenna í skátastarfi er eitt allra mikilvægasta hlutverk BÍS. Skýrir verkferlar eru til staðar til að fjalla um öll þau mál sem upp koma og eru þau afgreidd á faglegan hátt. Þessir verkferlar eru unnir í samstarfi Æskulýðsvettvangsins, sem er samstarfsvettvangur BÍS, KFUM/K, Landsbjargar, og UMFÍ um hagsmunamál barna og ungmenna, og Ráðuneytis barnamála, sem hefur sérstakan samskiptaráðgjafa til að aðstoða í öllum málum sem upp kunna að koma og er þeim vísað í réttan farveg og til þar til bærra yfirvalda eftir atvikum. Öll aðildarfélög Æskulýðsvettvangsins starfa eftir siðareglum sem aðildafélög hans hafa sett sér og öll mál afgreidd skv. sérstakri viðbragðsáætlun.
BÍS vill einnig koma á framfæri að hægt er að tilkynna öll mál sem upp kunna að koma í æskulýðs- og íþróttastarfi á vef samskiptaráðgjafa.
Nánari upplýsingar um málið í heild veitir stjórn BÍS og framkvæmdastjóri.
Námskeiðaáætlun Æskulýðsvettvangsins fyrir starfsárið 2023-2024
Námskeiðaáætlun Æskulýðsvettvangsins fyrir starfsárið 2023-2024 hefur verið birt!
Eitt af markmiðum Æskulýðsvettvangsins er að stuðla að aukinni fræðslu og forvörnum í íþrótta- og æskulýðsstarfi á Íslandi í þeim tilgangi að gera umhverfi barna og ungmenna í félagsstarfi öruggara. Námskeið Æskulýðsvettvangsins eru liður í því.