Tilkynning frá uppstillingarnefnd BÍS vegna Skátaþings 2024

Sækja tilkynningu á pdf formi

Á Skátaþingi helgina 5.-7. apríl n.k. verður kosið í neðangreind embætti í samræmi við lög BÍS. Uppstillingarnefnd hvetur skáta sem hafa áhuga og hugsjónir fyrir skátastarfi í landinu að skoða þau embætti sem eru laus til kjörs, að gefa kost á sér til starfa og hvetja aðra til þess. Lýsingar á þeim embættum sem kosið er í má finna neðst í þessari tilkynningu.
Athygli skal vakin á eftirfarandi:

• Kosið er í öll embætti annað hvert ár til tveggja ára.
• Við kosningu í stjórn BÍS er kosið sérstaklega um skátahöfðingja og gjaldkera en fimm meðstjórnendur eru kjörnir í einni kosningu.
• Kosið er í fjögur fastaráð: starfsráð, alþjóðaráð, útilífsráð og stjórn Skátaskólans.
• Kosið er í ungmennaráð (16 - 25 ára) og áheyrnarfulltrúa ungmenna í stjórn BÍS á ungmennaþingi 2 - 4. febrúar. Áhugasamir eru hvattir til að fylgjast með undirbúningi ungmennaþings, sækja þingið og bjóða sig fram.
• Kosið er um fimm sæti í uppstillingarnefnd, þrjá félagslega skoðunarmenn og löggiltan endurskoðanda.
• Uppstillingarnefnd skal leita eftir fólki til starfa fyrir Bandalag íslenskra skáta samkvæmt því sem fram kemur í 16. grein, 19. grein, 23. grein, 26. grein og 27. grein laga þessara og tryggja að í hvert laust sæti sé a.m.k. einn frambjóðandi.
• Stjórn hefur ákveðið fjölda fulltrúa í fastaráðum sbr 26. grein laga, sjá upptalningu að neðan.

EFTIRTALIN EMBÆTTI ERU LAUS TIL KJÖRS Á SKÁTAÞINGI

STJÓRN

Skátahöfðingi
Gjaldkeri
Fimm meðstjórnendur

FASTARÁÐ

Fjögur sæti í alþjóðaráði
Fjögur sæti í starfsráði
Fimm sæti í stjórn Skátaskólans
Þrjú sæti í útilífsráði

ANNAÐ

Fimm sæti í uppstillingarnefnd
Þrír félagslegir skoðunarmenn reikninga
Löggiltur endurskoðandi

KJÖRIN Á UNGMENNAÞINGI

Áheyrnarfulltrúi ungmenna í stjórn BÍS
Fimm sæti í ungmennaráði

Framboðstilkynningar og tillögur um fólk í þessi embætti óskast sendar uppstillingarnefnd hið fyrsta og eigi síðar en 15. mars kl. 12:00.
Tilkynningar um framboð þurfa að berast í tölvupósti á netfang uppstillingarnefndar.
Sérstök athygli er vakin á því að ekki er hægt að skila framboðum á þinginu sjálfu.

UPPSTILLINGARNEFND SKIPA:

LÝSING EMBÆTTA

Hér eru skýringar um helstu verkefni sem þau embætti sinna sem kosið verður í á Skátaþingi. Athugið að þetta eru ekki tæmandi listar og verkefnin geta verið jafn fjölbreytt og þau eru mörg. Ennfremur starfa ráð oft saman að ýmsum verkefnum.

STJÓRN

Skátahöfðingi er formaður sjórnar BÍS og leiðtogi alls skátasarfs á landinu.

Gjaldkeri situr í stjórn BÍS. Hann ber m.a. ábyrgð á fjármálum BÍS og vinnur náið með framkvæmdastjóra hreyfingarinnar að stjórn þeirra, framkvæmd fjáraflana, vinnslu bókhalds, áætlanagerð o.þ.h.

Meðstjórnendur (5) sitja í stjórn BÍS sem skiptir með sér verkum og ber m.a. sameiginlega ábyrgð á starfi stjórnar, ráða og nefnda. Sitja eftir atvikum í fastaráðum samkvæmt ákvörðun stjórnar.

Áheyrnarfulltrúi ungmenna hefur áheyrnarrétt í stjórn BÍS en ekki atkvæðisrétt. Kosið er í embættið á ungmennaþingi.

FASTARÁÐ OG FLEIRI EMBÆTTI

Hlutverk starfsráðs er að styðja við og efla starf skátafélaganna í samráði við stjórnir skátafélaga, sveitarforingja og flokksforingja.

Hlutverk alþjóðaráðs er að stuðla að því að að BÍS fylgi stefnum og nýti sér stuðningsefni frá alþjóðasamtökum skáta, WOSM og WAGGGS, ásamt því að annast samskipti við erlend skátabandalög, kynningu á erlendu skátastarfi á Íslandi og íslensku skátastarfi erlendis.

Hlutverk stjórnar Skátaskólans er að stuðla að þjálfun með skipulagningu námskeiða, er taki mið af Grunngildum Bandalags íslenskra skáta.

Hlutverk útilífsráðs er að hvetja til viðburða sem fela í sér útilíf og styðja við þá útilífsviðburði sem bæði skátafélög og BÍS standa fyrir.

Hlutverk ungmennaráðs er að hvetja til og auka ungmennalýðræði innan stjórnkerfis hreyfingarinnar og stuðla að virkri þátttöku ungmenna við stefnumótun eigin skátastarfs og hreyfingarinnar. Kosið er í ráðið á ungmennaþingi.

Uppstillingarnefnd skal leita eftir fólki til starfa í stjórn og fastaráð fyrir Bandalag íslenskra skáta. Við störf sín skal nefndin ávallt leita eftir sem hæfustum frambjóðendum og gæta þess, eftir því sem hægt er, að jafnræði sé með kynjunum í stjórn, nefndum og ráðum BÍS.

Félagslegir skoðunarmenn reikninga Félagsleg skoðun reikninga BÍS og dótturfélaga er í höndum þriggja manna félagslegrar skoðunarnefndar sem Skátaþing kýs. Félagslegir skoðunarmenn reikninga mega ekki sinna öðrum störfum fyrir BÍS sem snerta fjármál. Þeir bera ábyrgð gagnvart Skátaþingi og skulu eiga greiðan aðgang að öllu bókhaldi BÍS og er stjórninni skylt að veita þeim allar nauðsynlegar upplýsingar um fjármál og reikningshald þess.

Löggiltur endurskoðandi Reikningar BÍS og dótturfélaga skulu skoðaðir ár hvert af löggiltum endurskoðanda, kosnum af Skátaþingi.

by Katrín Kemp Stefánsdóttir

Nýr framkvæmdastjóri Grænna skáta

Jón Ingvar Bragason hefur verið ráðinn framkvæmdastjóri Grænna skáta. Jón Ingvar tekur við af Kristni Ólafssyni sem óskaði eftir starfslokum þar sem hann tekur sér nýtt starf fyrir hendur á sumarmánuðum. Nýr framkvæmdastjóri mun byrja með vorinu eftir nánara samkomulagi. Grænir skátar þakka Kristni kærlega fyrir vel unnin störf í uppbyggingu félagsins undanfarin ár.
Stjórn Grænna skáta hóf ráðningarferli á nýjum framkvæmdastjóra í byrjun janúar og var starfið auglýst í aldreifingu prentmiðla, á vefsíðu, Alfreð og samskiptamiðlum sem skátahreyfingin notar. Viðtöl við umsækjendur fóru fram í febrúar.
Jón Ingvar er viðskiptafræðingur og hefur verið skáti frá unga aldri. Síðastliðin þrjú ár starfaði hann sem rekstrarstjóri Heimaleigu sem er með um 400 íbúðir í skammtímaleigu fyrir ferðamenn. Jón Ingvar hefur unnið í fjölbreyttum störfum innan skátahreyfingarinnar lengst af sem viðburðastjóri, var framkvæmdastjóri World Scout Moot 2017 sem haldið var á Íslandi.
Um Græna skáta
Grænir skátar er endurvinnslufyrirtæki í eigu Skátahreyfingarinnar á Íslandi. Helstu verkefni þess er söfnun skilagjaldsskyldra umbúða frá fólki og fyrirtækjum. Fyrirtækið rekur 150 söfnunargáma á stór-höfuðborgarsvæðinu, móttökustöð fyrir skilagjaldsskyldar umbúðir auk söfnunar- og flokkunarstöðvar. Hjá fyrirtækinu starfa 40 starfsmenn í 20 stöðugildum. Fyrirtækið hefur langa sögu af því að bjóða fólki með skerta starfsgetu atvinnu. Allur ágóði af starfsemi félagsins fer til uppbyggingar skátastarfs á Íslandi. Fjölmörg skátafélög nýta jafnframt Græna skáta til fjáröflunar.

by Halldóra Aðalheiður ÓIafsdóttir

Skátapósturinn snýr aftur!

Mánaðarlega fréttabréfið okkar eða skátapósturinn snýr aftur!
Í skátapóstinum geta skátar og öll sem hafa áhuga séð yfirlit yfir helstu fréttir, viðburði, útköll og margt fleira spennandi sem er að gerast í skátastarfi á Íslandi.
Hér er hægt að lesa febrúar skátapóstinn og skrá sig á póstlistann til að fá pósta næstkomandi mánuði.

by Halldóra Aðalheiður ÓIafsdóttir

Nýtt ungmennaráð kosið á ungmennaþingi

Ungmennaþing var haldið fyrstu helgina í febrúar á Akranesi þar sem kosið var í ungmennaráð Bandalag íslenskra skáta.  Fimm sæti voru laus til kjörs í ungmennaráði auk þess sem kosið var í stöðu sérstaks áheyrnafulltrúa ungmenna í stjórn BÍS. Þau ungmenni sem voru kosin í embætti og myndi því nýtt ungmennaráð eru:

• Annika Daníelsdóttir Schnell - Skátafélagið Akraness
• Grímur Chunkuo Ólafsson - Skátafélagið Fossbúar
• Hafdís Rún Sveinsdóttir - Skátafélagið Fossbúar
• Lára Marheiður Karlsdóttir - Skátafélagið Fossbúar - Áheyrnafulltrúi ungmenna í stjórn BÍS.
• Þorkell Grímur Jónsson - Skátafélagið Garðbúar

Nýja ungmennaráðið hefur þegar hafið störf og héldu þau fyrsta ungmennaráðsfundinn strax í vikunni eftir ungmennaþing ásamt fráfarandi meðlimum sem munu vera nýja ráðinu innan handar fyrst um sinn.

Við óskum nýju ungmennaráði innilega til hamingju með kjörið og óskum þeim velfarnaðar í nýju hlutverki.

by Sædís Ósk Helgadóttir

Halldóra Aðalheiður ráðin sem Erindreki hjá BÍS

Halldóra Aðalheiður Ólafsdóttir hefur verið ráðin í fullt starf sem Erindreki BÍS.

Halldóra hefur góða reynslu af skátastarfi og hefur sinnt hinum ýmsu verkefnum fyrir hreyfinguna. Hún hefur verið foringi dreka- og fálkaskáta ásamt því að hafa verið aðstoðarforingi dróttskáta, skipulagt viðburði og klárað Gilwell svo einhvað sé nefnt. Halldóra ber með sér metnað, rólegt yfirbragð og góða samskiptahæfni. Hún mun taka við starfi erindreka og vinna að stefnu BIS við að styðja skátafélög landsins og vinna hin ýmsu verkefni sem falla til hjá Skátamiðstöðinni.

Við bjóðum Halldóru innilega velkomna til starfa.

by Halldóra Aðalheiður ÓIafsdóttir

Bjarki Rafn ráðinn til BÍS

Bjarki Rafn Andrésson hefur verið ráðinn til starfa hjá BÍS sem starfsmaður Landsmóts Skáta 2024.

Bjarki Rafn er dróttskátaforingi hjá Mosverjum og er á sinni Gilwell vegferð ásamt því að stunda nám við Háskóla Íslands í Tómstunda- og félagsmálafræði. Bjarki var í vettvangsnámi hjá BÍS í vetur og fékk þá innsýn inn í starfsemi Skátamiðstöðvarinnar. Hann hefur gaman að því að vinna með fólki, er skipulagður og ber með sér mikla jákvæðni og kraft. Bjarki mun taka við því mikilvæga verkefni að taka við samskiptum við erlenda skátahópa sem koma á Landsmót skáta 2024 ásamt því að sinna öðrum verkefnum við hlið mótsstýru Landmóts 2024.

Við bjóðum Bjarka innilega velkominn til starfa.

by Halldóra Aðalheiður ÓIafsdóttir

Egle verður næsti alþjóðafulltrúi WAGGGS

Stjórn BÍS hefur skipað Egle Sipaviciute sem næsta alþjóðafulltrúa fyrir WAGGGS. Egle verður tengiliður BÍS við alþjóðasamtök kvenskátahreyfingarinnar og á norrænum samstarfsvettvangi skáta ásamt því að vinna náið með alþjóðaráði BÍS. Egle tekur formlega við hlutverkinu frá Sunnu Líf á Skátaþingi en þangað til fylgist Egle með störfum Sunnu til að fá innsýn í þau verkefni sem alþjóðafulltrúi sinnir.  Stjórn BÍS óskar Egle innilega til hamingju með stöðuna og hlakkar til að starfa með henni í nýju hlutverki.

EN:

The board of Bandalag Íslenskra Skáta has appointed Egle Sipaviciute as the next International Commissioner for WAGGGS. Egle will represent BÍS within the World Association of Girl Guides and Girl Scout abroad and within the Nordisk Speiderkomité as well as working with BÍS's council on international scouting. Egle will take over the role from Sunna Líf at the next annual meeting but will be in training with Sunna until then. The board of BÍS would like to congratulate Egle on her new position and looks forward to working with her.

by Katrín Kemp Stefánsdóttir

Þórhildur fer í annað verkefni

Þórhildur fer í annað verkefni,

Þórhildur Elínardóttir Magnúsdóttir hefur síðastliðna mánuði sinnt verkefnastýringu á verkefni Inngildingar fyrir öll börn. Þórhildur fer nú að sinna öðrum verkefnum og eftir kraftmikið og gott samstarf í Skátamiðstöðinni.

Við óskum Þórhildi velfarnaðar í starfi og þökkum henni fyrir mikilvægt framlag til verkefnis Inngildingar í skátastarfi.

by Halldóra Aðalheiður ÓIafsdóttir

Áhugaskráning á MOOT 2025

Hefur þú áhuga á að fara á MOOT 2025 í Portúgal 25. júlí-3. ágúst? Ert þú fætt á bilinu 26. júlí 1999 - 25. júlí 2007? Þá hvetjum við þig til að forskráðu þig á mótið á Sportabler fyrir 25. janúar!

Við höfum opnað áhugaskráningu til að áætla stærð íslenska fararhópsins. Athugið að skráningin er ekki bindandi og ítarlegri upplýsingar um ferðina og verð verður sent út áður en formleg skráning opnar.

by Andrea Dagbjört