Útkall: Vertu í fararteymi á alheimsmót 2027
LANGAR ÞIG AÐ KOMA Í FARARTEYMIÐ SEM STUÐNINGUR VIÐ FARARSTJÓRANA ?
Fararstjórarnir leita að sjálfboðaliðum til að slást í hóp fararteymisins (e. contingent management team, CMT) á alheimsmóti skáta í Póllandi 2027.
Hvað felst í því að vera hluti af fararteymi Alheimsmóts (CMT)
Teymið samanstendur af fullorðnum sjálfboðaliðum sem bera ábyrgð á þátttakendum ferðarinnar, þau annast allan undirbúning og sinna allri upplýsingagjöf fram að ferðinni. Teymið undirbýr þátttakendur, sveitarforingja og IST liða fyrir það sem koma skal á mótinu og stýrir öllum ferðalögum hópsins frá því að farið er út og þar til komið er heim aftur en nýtur dyggrar aðstoðar sveitarforingja.
Á mótinu sjálfu annast fararteymið miðstöð fararhópsins í miðbæ mótsins, mætir á fararstjórnarfundi og miðlar upplýsingum áfram til sveitarforingja og þjónustuliða fararhópsins. Þau fylgjast með sveitum fararhópsins og passa að allt gangi eftir óskum og eru til taks ef eitthvað kemur upp. Þau annast einnig upplýsingagjöf til Skátamiðstöðvar og til forráðafólks þátttakenda eftir því sem við á.
Mikilvæg reynsla og færni fararteymisins (CMT)
- Hafa sterka reynslu af einhverju af eftirfarandi þáttum: öryggismálum, heilbrigðismálum, íslenskri menningu, alþjóðlegu skátastarfi, upplýsingamálum, þúsundþjalasmiður, ferðamálafræði, skipulagningu skemmtiferða, fjármálalæsi og utanumhald fjárhagsáætlunar.
- Góð kunnátta í ensku.
- Reynsla af fararstjórn, mótsstjórn eða annarri sambærilegri reynslu.
- Vinna vel í hópi og styðja teymisvinnu.
- Geta tekið ábendingum og leiðbeiningum annarra.
- Jákvætt lífsviðhorf og vilji til verka.
- Sjálfstæð og lausnamiðuð hugsun.
- Haft til þess burði að vera tvær vikur í tjaldútilegu og taka þátt í tjaldbúða lífi.
- Sveigjanleiki við breyttar aðstæður og góð aðlögunarhæfni.
Umsókn í stuðningshópinn, umsóknarfrestur er til 10. ágúst 2025
Athugið að ekki verður fyllt í allar stöður strax, heldur mun fararteymið stækka með fjölgun þátttakenda í fararhópnum. Ef það eru einhverjar spurningar þá er hægt að senda fyrirspurnir á fararstjórana á netfangið jambo2027@skatarnir.is.
Skátafélagið Klakkur leitar að starfsmanni
Skátafélagið Klakkur leitar að umsjónaraðila skátastarfs. Um er að ræða fullt starf til lok ársins 2026 með möguleika á framlengingu.
Allar nánari upplýsingar má sjá á myndinni eða fá hjá félagsforingja Klakks.
Líf í lundi: Brauðilmur og náttúrubingó í hjarta skógarins
Frétt og myndir frá Skógarskátum.
Líf í lundi á Úlfljótsvatni
Það vr eitthvað sérstakt við andrúmslotfið í skógarrjóðrinu við KSÚ á Úlfljótsvatni laugardaginn 21. júní síðastliðinn. Ilmur af nýbökuðu brauði blandaðist við sumarloftið, hlátur barna og mjúkan fuglasöng. Skógræktarfélag skáta við Úlfljótsvatn stóð þá fyrir sínum fyrsta Líf í lundi viðburði og úr varð samverustund í faðmi náttúrunnar.
Gestirnir - hátt í 25 manns - mættu vel búnir og tilbúnir að njóta dagsins, þrátt fyrir smá skúrir. Veðrið var milt, nánast stillt og regnið gaf stemningunni jafnvel meiri dýpt - eins og náttúran væri sjálf að taka þátt í hátíðinni.
Við eldstæðin var mikið fjör. Með birkigrein í hendi og pítsadeig vafið utan um bökuðu þátttakendur sitt eigið brauð. Þegar tók að rjúka úr deginu voru valkostirnir klárir: hvítlauksolía eða kanilsykur - eða bæði! Sérstaklega vinsælt reyndist að hella fyrst olíunni yfir og síðan sykrinum - olían virkaði sem fullkomið "lím" og úr varð brakandi góð blanda af krydduðu og sætu.
Fyrir þau sem vildu hreyfa sig var boðið upp á náttúrubingó. Gengið var í gegnum skóginn með bingóspjöld í hönd og augun opin fyrir laufblöðum, steinum og öðrum fjársjáðum skógarins. Þetta reyndist vinsælt hjá börnum og fullorðnum og veitti aukna tengingu við umhverfið.
Viðburðurinn vakti ánægju og sýndi að einföld gleði - eldur, brauð og náttúra - dugar langt til að skapa dýrmætar minningar. Skógræktarfélagið hvetur nú öll að ganga skógarstíginn sem hefst á litríkum steinum skammt frá undirgöngunum á Úlfljótsvatni - róleg ganga sem tekur einungis um 30 mínútur og hentar vel fyrir fjölskyldur.
Við þökkum öllum sem komu í lundinn kærlega fyrir og hlökkum til að sjá ykkur aftur á næsta Líf í lundi!
Hefur þú áhuga á lagasmíð?
Undirbúningur fyrir Landsmót 2026 er hafin og leitar nú BÍS og mótsstjórn Landsmóts að næsta mótslagi.
Hefur þig dreymt um að semja mótslag en ekki haft tíma eða ekki þorað að taka af skarið?
Nú er tækifærið til að semja lag og texta! Sendu inn þitt lag og það gæti orðið fyrir valinu fyrir Landsmót 2026.
Hægt er að senda inn myndbönd með lagi og hreyfingum til 21. ágúst næstkomandi hér.
Geimdrekar tóku yfir Úlfljótsvatn
Frétt skrifuð af mótsstjórn Drekaskátamóts 2025. Myndir: Andrea Dagbjört
Helgina 13.-15. júní héldu hátt í 200 drekaskátar á vit ævintýranna á landsmót drekaskáta 2025 á Úlfljótsvatni. Helgin var svo sannarlega ævintýraleg þar sem þema mótsins í ár var geimveruþema.
Skátarnir reistu glæstar tjaldbúðir í góðu veðri og landsmót drekaskáta var svo sett með miklum látum þegar hann Goggi geimvera brotlenti geimflauginni sinni. Þar komu skátarnir sér saman um að hjálpa þyrfti Gogga aftur heim til plánetunnar sinnar Zurka.
Á laugardeginum unnu skátarnir hörðum höndum að því að safna stjörnuorku til þess að knýja geimskipið hans Gogga áfram. Til dæmis var klifrað í klifurturninum, buslað í vatnasafaríinu og farið í bogfimi. Einnig máluðu skátarnir steina til þess að skreyta nýju fallegu gönguleiðina. Sumir máluðu meira að segja steina með myndum af plánetunni Zurka svo að Goggi fengi ekki heimþrá. Ekki var það verra að íslenska sumarið skartaði sínu allra fegursta og glampandi sólin lék við drekaskátana allan daginn. Þegar kvöldaði vantaði þó enn stjörnuorku í geimskipið hans Gogga og eftir vel heppnaða kvöldvöku heyrðust orðrómar um að vísindamenn væru komnir á kreik, tilbúnir að selja skátunum stjörnuorku gegn því að leysa þrautir. Skátarnir voru ekki lengi að hlaupa af stað og finna vísindamennina, enda þótti þeim vænt um Gogga og vildu óðum hjálpa honum að komast heim.
Óhætt er að segja að skátarnir stóðu sig með prýði við söfnun stjörnuorkunnar og Goggi kvaddi þakklátur þegar hann flaug til heimaplánetunnar sinnar Zurka í geimflauginni sinni. Allt er gott sem endar vel og landsmót drekaskáta 2025 endaði svo sannarlega vel. Vert er að minnast á að í ár hefur mótsstjórn síðustu ára unnið að því að þjálfa nýja mótsstjórn samhliða undirbúnings mótsins. Mótsstjórnin var því vel mönnuð af bæði miklum reynsluboltum sem og nýjum og metnaðarfullum mótsstjórnarmeðlimum. Fráfarandi mótsstjórnarmeðlimir kveðja stoltir og bjartsýnir fyrir nýrri mótsstjórn komandi drekaskátamóta og þakka innilega fyrir samfylgdina síðustu ár.
Effelturninn súrraður á Úlfljótsvatni!
Helgina 25. - 27. apríl síðastliðinn mættu 36 dróttskátar víðsvegar af höfuðborgarsvæðinu á súrr viðburðinn - DS. Súrr-realisma á Úlfljótsvatni. Viðburðurinn var haldinn af Grænjöxlunum, viðburðarsveit sem var að halda sinn annan viðburð. Síðast héldu Grænjaxlarnir 18:23 árið 2023 svo það stefnir í eitthvað spennandi 2027.
Hugmyndin með DS.Súrr-realisma var að þátttakendurnir fengu tækifæri til þess að súrra eitthvað flippað, annað en þeir eru vanir að gera á skátamótum eða fundum, sem þeir gerðu svo sannarlega. Hitt markmiðið okkar var að gista í tjöldum og halda í klassíska tjaldútilegu stemningu. Helgin byrjaði á því að þátttakendurnir skiptu sér í flokka og plönuðu hvað þeir ætluðu að súrra daginn eftir.
Flokkarnir voru
- Alltaf aftur, sem súrruðu stað til að hanga
- Df. Zipz, sem súrruðu aparólu á upphækkuðum palli
- Föðurlandsþjófarnir, sem súrruðu borð með hangandi bekk og netahengirúmi
- Gervi-Frakkar, sem súrruðu Eiffel turninn (e.þ.s. þrífótaþrífóturinn)
- Klifurgengið, sem súrraði brú með neti
- Reynir, sem súrraði stað til að hanga
Laugardagurinn byrjaði á fánaathöfn, morgunleikfimi og fána og svo fór restin af deginum í að súrra. Þess á milli skiptust flokkarnir á að elda fyrir hópinn, sem heppnaðist ljómandi vel. Á laugardagskvöldinu, þegar allar súrr-byggingar voru reistar, var haldin skemmtileg kvöldvaka þar sem allir flokkarnir voru með skemmtiatriði og svo var farið í æsispennandi næturleik - þorpaleikinn. Dagurinn endaði svo á klassísku skátakakó og kexi. Á sunnudeginum fengu þátttakendurnir tækifæri til að sýna hvort öðru trönubyggingarnar sínar áður en tekið var saman og haldið heim á leið.
Vert er að minnast á að mikil áhersla var lögð á öryggi og flokkarnir sem voru að súrra hátt uppi voru vel tryggðir í beltum og hjálmar hafðir við alltaf þegar eitthvað átti á hættu á að detta niður á fólk. Einnig var lagt upp með að skera ekki á nein bönd, #Náttturuvinur, en til að gera það þarf að brenna endana strax og böndin eru skorin og setja smá vinnu í að leysa hnútana á sunnudeginum.
Það sem stóð upp úr á viðburðinum var að sjá hugmyndir flokkana verða að veruleika; að sjá samvinnuna, þrautsegjuna og metnaðinn sem þurfti til að fá allar trönubyggingarnar til að rísa. Þeir gáfust ekki upp, þó svo að súrrið hafi verið erfitt. Þá fundu þeir nýjar leiðir og héldu áfram að reyna. #PGM! (Plana, gera og meta).
Frétt skrifuð af Grænjöxlum.
Úlfur umsjónarmaður í Undralandinu
Úlfur Fríðuson var nýlega ráðinn í starf umsjónarmanns fasteigna og útisvæða í Útilífsmiðstöð skáta Úlfljótsvatni. Úlfur hefur yfirumsjón með viðhaldi húsnæðis og annarra innviða á Úlfljótsvatni. Hann sér einnig um umhirðu, ræktun og slátt á tjaldsvæðinu, sér um að halda ökutækjum og öðrum búnaði í góðu ástandi og sér um gerð viðhalds- og kostnaðaráætlana fyrir stærri verkefni.
Úlfur nam smíðar við Tækniskólann en hefur síðustu ár unnið við úttektir á brunakerfum. Þá hefur hann umtalsverða reynslu af skátastarfi og var m.a. starfsmaður skátafélagsins Seguls um tíma.
„Mér finnst frábært að vera kominn hingað og fá að vinna í svona fallegu umhverfi og með besta fólkinu“ segir Úlfur. „Og heiður að fá að sinna og leiða skátana hér áfram í viðhaldi og uppbyggingu á svæðinu,“ bætir hann við.
Við bjóðum Úlf hjartanlega velkominn til starfa, og óskum honum velfarnaðar í starfi.
Nýkjörin stjórn Skátagildanna á Íslandi
Guðni Gíslason, landsgildismeistari
Sigríður Kristjánsdóttir, varalandsgildismeistari
Þóra Guðnadóttir, ritari
Hjördís Sigursteinsdóttir, gjaldkeri
Agnes Ösp Þorvaldsdóttir, alþjóðlegur bréfritari
Laufey Bragadóttir, varamaður í stjórn
- Að efla kynningarstarf og gera gildisstarfið meira áberandi
- Að efla tengsl skátagildanna
- Að hvetja til fjölgunar í starfandi gildum
- Að hvetja til stofnunar nýrra skátagilda
- Að efla enn fremur samstarf við BÍS og skátafélögin
Á þinginu var samþykkt tillaga fráfarandi stjórnar að styrkja Karmelsystur í Hafnarfirði um 500 þúsund kr. til byggingar hjúkrunardeildar við klaustrið en Karmelsystur hafa hýst Friðarlogann í góðu samstarfi við Skátagildin í fjölmörg ár.
Fararstjórar á Jamboree í Póllandi 2027
Stjórn BÍS hefur falið þeim Dagbjörtu Brynjarsdóttur og Dagmari Ýr Ólafsdóttur það hlutverk að vera fararstjórar fararhóps BÍS á Jamboree í Póllandi 2027.
Dagbjört eða Dagga eins og hún er ávallt kölluð kemur úr Mosverjum og Dagmar kemur úr Skjöldungum, þær hafa verið í skátaflokk saman í mörg ár, eru Gilwell skátar og hafa unnið að ýmsum skátaverkefnum saman, stórum og smáum.
Þeim hlakkar til að takast á við það verkefni að leiða fararhóp BÍS á alheimsmót í Pólandi þar sem „Hugrekki“ er slagorð mótsins!
Okkur hjá BÍS hlakkar til samstarfsins og óskum þeim til hamingju með nýtt hlutverk!
Hlutu styrk úr Loftlagssjóði ungs fólks
Ungmennaráð BÍS hlaut styrk úr Loftlagssjóði ungs fólks og tóku við styrknum í Höfða í gær. Við óskum þeim til hamingju og hlökkum til að sjá verkefnið þeirra "Tré og tjútt" verða að veruleika 
Emil Kjartan Valdimarsson og Þorkell Grímur Jónsson fulltrúar Ungmennaráðs tóku við styrknum.
Tré og tjútt í Esjuhlíðum er viðburður þar sem tré eru gróðursett í Esjuhlíðum ásamt útilegu, fræðslu og gerð kynningarefnis um náttúru og gróðursetningu.
