Að vera einn með sjálfum sér

Að vera einn með sjálfum sér

Hrafnkell Úlfur Ragnarsson, Fossbúi og einbúi

“Öll vandamál mannsins stafa frá vangetu hans til þess að sitja einn í þöglu herbergi.”

-Blaise Pascal

Hringferð í kringum sjálfan sig

Sú alda hófst þegar árið var hálfnað og mánuðurinn það líka og öll ungmenni landsins höfðu klárað sinn skólaskammt og veðrið varð betra að þau hópuðu sig mörg saman í sitthvoru lagi með það fyrir stafni að keyra hringinn í kringum landið. Þessi alda skvettist yfir alla þá samfélagsmiðla sem fyrirfundust og var enginn öruggur fyrir myndum af þeim mörgum náttúruperlum sem að Ísland hefur að geyma. 

En hvað með einstakling sem finnst fátt leiðinlegra en að keyra bíl? Hvað getur hán gert? Hán getur í stað þess að fara vikulanga hringferð í kringum landið ákveðið að halda sér á sama stað og farið í hringferð í kringum sjálfan sig innra með sér. Hringferð þar sem engar náttúruperlur eru að finna heldur er einungis að finna margar mismunandi hliðar á sjálfum sér. Hán getur gert eins og ég gerði og prófað að vera eitt með sjálfum sér í viku.

Ég fór því í málið og sendi póst á Stefán skálavörð Þryms sem tók afar vel í hugmyndina og fyrr en varir var ég búinn að leigja Þrym út í viku. Þetta myndi verða vika þar sem ég myndi ekki hafa aðgang að rafmagni, klukku, rennandi vatn né klósetti. En í stað þess að einblína á allt það sem ég myndi ekki hafa aðgang að í viku hugsaði ég mun frekar um það sem ég gæti gert yfir vikuna. Því þetta myndi verða vika af einsetu, lestri, göngum, frelsi, næði og rólegheitum.

Kvikmyndafólk í leit að aðstoð

Upp rann brottfarardagur án mikils undirbúnings og var pakkað því mikilvæga, fötum, stafla af bókum og haldið út í búð til að fylla kerruna af mat þangað til að hrúgan leit út fyrir að vera sjö daga virði af næringu. Eftir það var yfirgefið siðmenninguna og haldið á leið til Þrymheima. Þegar komið var voru allir kvaddir á einn hátt eða annan og svo slökkt á símanum og yrði hann svo ekki notaður út vikuna, og var einveran þar með hafin og mundi hún ekki vera brotin nema tvisvar yfir alla vikuna. Í báðum tilfellum voru þetta örstuttar utanaðkomandi heimsóknir sem að entust samanlagt ekki nema um 10 mínútur. Í fyrra tilfellinu kom kvikmyndatökufólk í leit að aðstoð vegna þess að þau fundu ekki Bæli, en höfðu þó fundið Kút, og seinna tilfellið var fjölskylda sem átti leið hjá og ákvað því að banka upp á Þrym til að sjá hvað var um að vera, og bjóst líklega ekki við einbúa.

Frelsandi og einfalt líf

En í hverju fólst þessi vikulanga einvera? Fyrst og fremst fólst hún í miklum lestri samhliða því að kanna þá náttúru sem í nærumhverfinu var, og einfaldlega því að vera einn og gera ekki neitt. Þessi einvera var gífurlega frelsandi og róleg. Ég var ekki með neitt skipulag yfir vikuna að því frátöldu að ganga í og baða mig í Reykjadal sem að ég gerði á fimmtudeginum. Þetta skipulagsleysi leiddi til þess að ég bar ekki ábyrgð á neinu og þurfti því ekki að hafa áhyggjur af neinu. Einnig hjálpaði það að ég var ekki með neina klukku á mér og vissi því aldrei hvað klukkan var og gat því aldrei skipulagt neitt almennilega. Dagurinn skiptist því í þrjú mislöng tímabil, þegar sólin var uppi, þegar sólin var komin fyrir fjall og þegar sólin var sest. Þetta þýddi að ég fór yfirleitt að sofa stuttu eftir að sólin sast og vaknaði þegar hún byrjaði að skína í gegnum gluggana hjá mér, aldrei vitandi hvað klukkan var í raun.

Lífið yfir þessa viku snérist um að vakna, gera mér hafragraut, lesa bækur, fara í göngur, saga niður eldivið, kynda kamínuna þegar sólin var farin fyrir fjall og það byrjaði að kólna, elda mér kvöldmat. Þetta var afar einfalt líf, en mér leiddist aldrei heldur var það þveröfugt. Þetta var allt afar fljótt að líða og áður en ég vissi af var dvöl minni í Þrym lokið. Ég lærði margt um sjálfan mig og lífið almennt í þessari ferð, og var það ekki bara í gegnum lestur á bókum sem það gerðist heldur var það vegna einsetu minnar sem að ég náði að kynnast sjálfum mér svona vel. Þetta var einfalt líf, en þetta var gott og kósý líf.

by Sædís Ósk Helgadóttir

Nýr alþjóðafulltrúi WAGGGS

Við kynnum með stolti nýjan alþjóðafulltrúa BÍS. Sunna Líf Þórarinsdóttir verður fyrsti tengiliður BÍS við heimssamtök kvenskáta og Þórey verður fyrsti tengiliður BÍS við heimssamtök skáta. Stjórn BÍS hefur skipað þær í hlutverkin til Skátaþings 2022 og munu þær að sjálfsögðu einnig starfa með alþjóðaráði. Við viljum jafnframt þakka Eriku Eik fyrir að hafa staðið vaktina sem alþjóðafulltrúi síðasta hálfa árið og óskum henni góðs gengis í háskólanámi í Finnlandi.

Fyrsta verkefni Sunnu var að mæta á fund hjá Norðurlandasamstarfi skáta um síðustu helgi, í fjarfundi að sjálfsögðu.

by Sædís Ósk Helgadóttir

Fjölskylduskátasveit Skjöldunga tók á móti tilnefningu

Foreldraverðlaun Heimilis og skóla voru afhent í 25. sinn við hátíðlega athöfn í Safnahúsinu við Hverfisgötu á afmælisdegi samtakanna, 17. september 2020. Þar tók Helga Þórey, félagsforingi Skjöldunga við tilnefningu um Foreldraverðlaunin fyrir verkefnið Fjölskylduskátasveit Skjöldunga.

Við á Skátamiðstöðinni óskum þeim innilega til hamingju með þessa flottu tilnefningu!

by Sædís Ósk Helgadóttir

Skátaþing 2020 - Fundarboð

Stjórn Bandalags íslenskra skáta hefur sent fundarboð og boðað til Skátaþings 2020.

Fundarboðið er svohljóðandi:

Með bréfi þessu boðar stjórn Bandalags íslenskra skáta til Skátaþings 2020.

Þingið verður haldið þann 31. október 2020 í félagsheimili Fáks, Vatnsveituvegi í Víðidal.  Fulltrúar með atkvæðisrétt geta tekið þátt í gegnum fjarfundabúnað og gildir sami skráningarfrestur á þingið.  Streymt verður frá þinginu á vefsíðu skátanna.  Þingsetning er klukkan 9:00 og húsið opnar 8:30.

Sérstök athygli er vakin á því að aftur er hægt að skila inn framboðum, beiðnum um upptöku mála og lagabreytingum en þessi frestur færist með breyttri dagsetningu líkt og 17. og 18. grein laga BÍS kveða á um.

Afhending þinggagna fer fram á fundarstað, þangað til eru þau aðgengileg á vefsvæði skátaþings sem má finna á slóðinni: https://skatarnir.is/skatathing.

Dagskrá þingsins er skv. 20. grein laga BÍS en einnig er rétt að vekja sérstaka athygli á greinum 16 – 19 í lögum BÍS sem fjalla um Skátaþing.

Við undirbúning þingsins verður lögð áhersla á að virkja alla þátttakendur. Til þess að þetta megi takast sem best er nauðsynlegt að skráning þátttakenda berist tímanlega. Allir starfandi skátar hafa rétt til að sitja Skátaþing með málfrelsi og tillögurétti. Skátafélög eru hvött til þess að vekja athygli sinna skáta á þinginu.

Þátttökugjald er 2.500 kr. og innifalin eru þinggögn og léttar veitingar á meðan á þingi stendur.  Ekkert þátttökugjald er fyrir fulltrúa sem taka þátt í gegnum fjarfundabúnað.

Skráning þingfulltrúa er hafin á: https://sportabler.com/shop/skatarnir og skulu þingfulltrúar hafa skráð sig eigi síðar en laugardaginn 24. október 2020. Rétt er að ítreka að ALLIR skátar sem hyggjast taka þátt í þinginu skrái þátttöku sína.

Rétt er að minna á að lokafrestur til að skila stjórn BÍS tillögum til breytinga á lögum BÍS er 4 vikum fyrir þing, þ.e. 3. október og lokafrestur til að skila beiðnum til stjórnar BÍS um upptöku mála á Skátaþingi er 3 vikum fyrir þing, þ.e. 10. október.

Eftirtalin hlutverk eru laus til kjörs:

Uppstillinganefnd lagði fram lista með frambjóðendum í öll ofangreind embætti fyrir Skátaþing sem átti að vera í apríl í samræmi við lög BÍS. Sjálfkjörið hefði verið í öll embætti og í vor gaf félagsforingjafundur heimild til að þeir hópar hæfu störf sem óformlegir vinnuhópar fram að Skátaþingi.

Engu að síður er framboðsfrestur til klukkan 12:00 laugardaginn 10. október. Þau sem eru áhugasöm um einhver þessara embætta skulu senda tilkynningu um framboð sitt á netfangið uppstilling@skatar.is.

Uppstillinganefnd skipa:
Andri Týr Kristleifsson            andri@kopar.is                        860-1923
Berglind Lilja Björnsdóttir       berglind@skatar.is                  659-1366
Birgir Þór Ómarsson               biggiomars@gmail.com          895-7551
Helga Rós Einarsdóttir            helgaros@gmail.com              659-4949
Sigurður Viktor Úlfarsson        siggiulfars@gmail.com            854-0074

Skátafélög með aðild A og B skulu skila kjörbréfum fyrir setningu Skátaþings en það skal gert rafrænt á slóðinni: https://skatarnir.is/kjorbref.

Vert er að nefna að þau sem skiluðu framboðum og tillögum fyrir þingið í vor þurfa ekki að gera það aftur.

Reykjavík, 11. september 2020.

F.h. stjórnar BÍS,
Guðmundur S.
Fjármála- og verkefnastjóri BÍS

by Sædís Ósk Helgadóttir

Kynningarfundir um nýja stefnu skáta

Fjórir fjörugir kynningarfundir

Stefnunni er skipt í nokkra kafla og býður stjórn skátum til fjögurra og fjörugra umræðufunda á netinu þar sem farið verður á dýptina í einstaka þætti stefnunnar:

Fólk

Í þessum kafla stefnunnar verður fjallað um mannauðinn og hvernig skátarnir munu bjóða sjálfboðaliðum og starfsfólki upp á heilbrigt og uppbyggilegt starfsumhverfi. Haldinn verður netfundur 15. september. Smelltu hér fyrir tengil á viðburðinn.

Framsýni

Í þessum kafla stefnunnar verður fjallað um hvernig skátarnir munu starfa í takt við tímann og oftar en ekki einu skrefi á undan, eins og segir í drögum að stefnunni. Haldinn verður netfundur 21. september. Smelltu hér fyrir tengil á viðburðinn.

Færni

Í þessum kafla stefnunnar verður fjallað um hvernig skátarnir ætla með vandaðri dagskrá og þjálfun að veita þátttakendum tækifæri til að öðlast færni til framtíðar. Haldinn verður netfundur 30. september. Smelltu hér fyrir tengil á viðburðinn.

Stefnan í heild

Á síðasta netfundinum verður stefnan í heild til umræðu og er það jafnframt síðasti séns til breytinga á þeirri tillögu sem lögð verður fyrir skátaþing. Haldinn verður netfundur 8. október. Smelltu hér fyrir tengil á viðburðinn.

Hvað er skátastarf?

„Flestir eru sammála um hver séu stóru málin í skátahreyfingunni, en við þurfum öll að vera saman í að keyra þau áfram,“ sagði Harpa Ósk Valgeirsdóttir, formaður dagskrárráðs í viðtali fyrr í sumar um mikilvægi þess að skátar kynni sér stefnuna. „Við þurfum öll að vera meðvituð um hvert við erum að fara og þessi stefna hjálpar okkur við að vita það og hjálpar okkur við að svara spurningunni hvað er skátastarf“

by Sædís Ósk Helgadóttir

Útkall - Landsmótsstjórn

Langar þig að taka þátt í að skipuleggja Landsmót skáta á Úlfljótsvatni næsta sumar. Við leitum að áhugasömum einstaklingum til að takast á við skemmtilegt og krefjandi verkefni.

Okkur vantar;

Mótsstjóra

Aðstoðarmótsstjóra/starfsmannamál

Tækni- og tjaldbúðarstjóra

Dagskrárstjóra

Fjölskyldubúðastjóra

Nánari upplýsingar gefur Kristinn framkvæmdastjóri BÍS í síma 550-9800

Umsóknarfrestur er til 17. sept 2020.

Áhugasamir geta sent póst á kristinn@skatar.is

by Sædís Ósk Helgadóttir

Landsmót verður á Úlfljótsvatni næsta sumar

Ákveðið hefur verið að halda landsmót skáta á Úlfljótsvatni næsta sumar- 14. – 21. júlí 2021.

Upphaflega átti að halda mótið í sumar en vegna fjöldatakmarkana vegna Covid-faraldursins féll það niður. Stefnt var á Akureyri sem mótsstað, en eftir að hafa metið heildarstöðuna ákvað stjórn Bandalags íslenskra skáta að færa mótið á Úlfljótsvatn og þar verður það haldið sumarið 2021.

„Við erum með mikinn búnað og góða aðstöðu á Úlfljótsvatni. Það var ekki auðvelt að taka þessa ákvörðun, en við teljum að það sé skynsamlegt í stöðunni eins og er,“ sagði Kristinn Ólafsson, framkvæmdastjóri Skátamiðstöðvar þegar hann kynnti málið á vel sóttum fjarfundi með félagsforingjum í gærkvöldi.

Ólöf Jónasdóttir, sem tók að sér stöðu mótsstjóra á liðnum vetri, þegar til stóða að halda mótið á Akureyri, tók undir orð Kristins um að það væri rétt  ákvörðun að færa mótið á Úlfljótsvatn.  „Við eigum að setja fókus á að halda Úlfljótsvatni gangandi,“ sagði hún. „Við hefðum auðvitað viljað halda mótið hér á Hömrum á Akureyri, en þetta er það skynsamasta í stöðunni.“

 „Það er búið að vinna töluverða undirbúningsvinnu sem við munum skila til þeirra sem taka við mótinu,“ segir Ólöf sem nú lætur af störfum sem mótsstjóri. Félagsforingjar og stjórn BÍS þökkuðu Ólöfu fyrir hennar vinnu.  Þema landsmótsins verður tengt heimsmarkmiðum sem skátar hafa hlúð að í sínu starfi, en einkunnarorð mótsins eru Byggjum betri heim.

Á næstunni verður leitað eftir nýju fólki til að koma inn í mótsstjórn. Kristinn er bjartsýnn á að það muni ganga vel. „Mögulega náum við að  virkja á ný einhver þeirra sem tóku þátt í að skapa Moot heimsmótið sem haldið var á Úlfljótsvatni,“ segir hann og gerir ráð fyrir að næstu daga verði sent út opið kall eftir þeim sem vilja taka þátt í að halda Landsmót.

by Sædís Ósk Helgadóttir