Skátahreyfingin tilnefnd til Friðarverðlauna Nóbels
Skátahreyfingin tilnefnd til Friðarverðlauna Nóbels
Heimssamtök skátahreyfinga (WOSM) og Heimssamtök kvenskáta (WAGGGS) hafa verið tilnefnd til Friðarverðlauna Nóbels 2021. Tilnefningin er fyrir framúrskarandi aðgerðir í þágu valdeflingar ungmenna um allan heim til uppbyggingar friðarmenningar í sínu nærumhverfi í meira ein heila öld.
Það var norski þingmaðurinn og fyrrum skátahöfðingi Noregs, Solveig Schytz, sem sendi tilnefninguna inn.
“Skátahreyfingin snýst um að gefa ungu fólki tækin sem þau þurfa til að leysa áskoranir framtíðarinnar samhliða því að byggja upp sterkt samfélag. Þessi vinna er nauðsynleg fyrir heimsfrið.”
“Nú þegar svo margar ógnir steðja að samfélagi manna, hvort sem það er loftslagsvá, stríð eða sjúkdómar, er þörf á mótvægi við sjálfselsku og þjóðernishyggju. Við þurfum að gefa ungu fólki tækifæri til að sameinast um gildi og þjónustu, ekki bara í þágu síns samfélags heldur einnig alþjóðasamfélagsins.”
Síðan skátahreyfingin var stofnuð árið 1907 hefur starfið snúist um valdeflingu ungs fólks með leiðtogaþjálfun og framtíðarfærni svo þau geti unnið að friði í sínu nærumhverfi. Skátastarfið byggir upp friðarmenningu með því að tvinna samvinnu, samstöðu og alþjóðasamstarf inn í verkefni ungmennanna.
Síðastliðinn áratug hefur flaggskipsverkefni alþjóðaskátahreyfingarinnar, Messengers of Peace, veitt skátum um allan heim innblástur til að grípa til aðgerða í sínu nærumhverfi. Friðar- og sjálfbærniverkefnin eru orðin yfir 16 milljón talsins.
Þetta er ekki í fyrsta skiptið sem skátahreyfingin fær tilnefningu til Friðarverðlauna Nóbels. Ekki er sopið kálið þó í ausuna sé komið því í febrúar kemur í ljós hvort skátahreyfingin nái inn á stutta listann yfir tilnefningar.
Laust sæti í stjórn BÍS
Tilkynning frá uppstillingarnefnd BÍS vegna mönnunar í stjórn BÍS
Tilkynning frá uppstillingarnefnd BÍS vegna mönnunar í stjórn BÍS
Á félagsforingjafundi á næstunni verður kosið í hlutverk meðstjórnanda í stjórn BÍS. Þessi stjórnarmeðlimur skal samkvæmt lögum BÍS vera 25 ára eða yngri.
Uppstillingarnefnd hvetur skáta sem hafa áhuga og hugsjónir fyrir skátastarfi í landinu að skoða þetta spennandi hlutverk sem nú er á lausu, að gefa kost á sér til starfa og hvetja aðra til þess. Kosið er í hlutverkið fram að Skátaþingi 2022.
Meðstjórnendur í stjórn BÍS skipta með sér verkum og bera m.a. sameiginlega ábyrgð á starfi stjórnar, ráða og nefnda. Þeir sitja eftir atvikum í fastaráðum samkvæmt ákvörðun stjórnar.
Framboðstilkynningar og tillögur um fólk í hlutverkið óskast sendar uppstillingarnefnd hið fyrsta og eigi síðar en 5. febrúar kl. 12:00. Í framhaldinu mun uppstillingarnefnd taka saman gild framboð og koma þeim upplýsingum til félagsforingja sem samkvæmt lögum BÍS kjósa í hlutverkið á félagsforingjafundi.
Tilkynningar um framboð þurfa að berast skriflega eða í tölvupósti á netfang uppstillingarnefndar: uppstilling@skatar.is.
Uppstillingarnefnd skipa:
Berglind Lilja Björnsdóttir, s: 659-1366, berglind@skatar.is
Birgir Ómarsson, s: 895-7551, biggiomars@gmail.com
Katrín Kemp Stefánsdóttir, s: 824-1865, katrinkemp@kopar.is
Sigurður Viktor Úlfarsson, s: 854-0074, siggiulfars@gmail.com
Sædís Ósk Helgadóttir, s: 661-6433, saedisoskh@gmail.com
Stjórn BÍS þakkar Ásgerði innilega fyrir gott samstarf og óskar henni velfarnaðar í þeim verkefnum sem hún tekur sér fyrir hendur.
Útilegur með grunnskólabörn
Útilegur með grunnskólabörn
FYRIRSPURNIR UM ÚTILEGUR
Fjöldi fyrirspurna hefur borist Skátamiðstöðinni frá skátafélögum um útilegur með grunnskólabörnum (dreka-, fálka- og dróttskátum). Því áframsendi Skátamiðstöðin fyrirspurnina á yfirvöld.
Samkvæmt svörum heilbrigðisráðuneytis fer það ekki gegn ákvæðum reglugerðar um skólahald (sem æskulýðsstarf nær undir) að fara með ungmenni í útilegur en ítrekað að gæta ávallt ýtrustu sóttvarnarsjónarmiða.
LEIÐBEININGAR BÍS UM ÚTILEGUR
Skátafélögunum er heimilt að fara í flokks- og sveitarútilegur með skátum á aldursbili dreka-, fálka- eða dróttskáta. Þannig skal eingöngu fara með þau ungmenni saman í útilegu sem hittast á vikulegum skátafundum en ekki blanda hópum í útilegum milli skátasveita né á milli skátafélaga. Hámarksfjöldi er 50 líkt og á skátafundum.
Fjölda sjálfboðaliða sem fer með ungmennunum í útilegu skal halda í lágmarki en þó vera nægur til að anna ungmennunum og gæta öryggis í útilegunni. Hámarskfjöldi sjálfboðaliða er 20. Sjálfboðaliðar skulu gæta fjarlægðartakmarkana gagnvart hvoru öðru og bera andlitsgrímur þegar það er ekki hægt.
Foreldrar mega skutla og sækja ungmenni og farangur í útilegu á meðan að á henni stendur en heimsóknir foreldra og annarra ungmenna en þeirra sem eru í skátasveitinni skulu vera óheimilar í útilegunni. Eins skulu aðrir sjálfboðaliðar ekki vitja útilegunnar nema nauðsyn krefji.
Eingöngu skal fara í útilegu ef hægt er að gæta ýtrustu sóttvarnarsjónarmiða m.a. með því að hafa góða aðstöðu til handþvotts, hafa spritt aðgengilegt öllum stundum, þrífa sameiginlega fleti reglulega og tryggja góða loftræstingu.
Stjórn og skátaforingjar skátafélaga skulu sameiginlega gæta þess að upplýsa forráðafólk ungmenna vel áður en farið er í útilegu.
Skipting félaga - Skátasumarið á Úlfljótsvatni
Skipting félaga - Skátasumarið á Úlfljótsvatni
Kæru skátar
Nú í hádeginu var dregið um dagsetningar fyrir Skátasumarið á Úlfljótsvatni í sumar. Við byrjuðum á því að skipta félögunum upp í þrjá hópa, erindrekarnir voru okkur innan handar en þeir þekkja vel til félagana. Við fengum aðstoð frá hlutlausum aðila og drógum um dagsetningar. Við reyndum að gera þetta eftir okkar bestu getu. Vonandi verða allir sáttir með úthlutunina og geta farið að skipuleggja sumarið.
Drekaskátar verða velkomnir á mótið og verður tekið sérstakt tillit til þeirra í dagskránni. Nánari upplýsingar munu berast á næstunni frá mótsstjórn sem vinnur að undirbúningi. Skátasumarið 2021 á Úlfljótsvatni verður mikið ævintýri fyrir skátana okkar. Það mun kosta 39.000 kr. Allur matur og dagskrá innifalið í verði. Við erum að skoða hvernig verður staðið að endurgreiðslu til þeirra sem voru búnir að greiða fullt gjald fyrir Landsmót 2020. Meira um það síðar.
Búið er að draga skátafélögin á dagsetningar. Það var gert hér í hádeginu af hlutlausum aðila.
7.- 11 júlí: Skjöldungar, Landnemar, Klakkur, Eilífsbúar, Vífill, Heiðabúar, Mosverjar og Faxi
14.-18. Júlí: Segull, Hafernir, Árbúar, Vogabúar, Hraunbúar, Fossbúar, Strókur og Örninn
21.-25. Júlí: Kópar, Svanir, Borgarnes, Akranes, Stígandi, Garðbúar og Ægisbúar
Skátastarf rekka- og róverskáta frá 13. janúar
Skátafundir rekka- og róverskáta
Við höfum fengið það staðfest að samkvæmt nýjum reglugerðum sem tóku gildi 13. janúar mega rekka- og róverskátar hefja skátastarf aftur.
Þær reglur sem gilda eru:
- Hámarksfjöldi á skátafundum er 50 manns
- Aðstaðan skal þrifin reglulega og snertifletir sótthreinsaðir milli allra hópa
- Sameiginleg áhöld skulu sótthreinsuð a.m.k. tvisvar á dag
- Loftræsting skal vera í lagi og loftað reglulega út yfir daginn
- Nota skal andlitsgrímur þar sem ekki er unnt að tryggja 2 metra nálægðartakmörkun, mælst er til þess að allir beri grímu á meðan skátafundi stendur
Sé þess kostur skal skátastarf fara fram utandyra. Fari starf fram innanhúss skal gæta góðra þrifa á almennum snertiflötum og loftræsa rými. Áfram skal gæta persónubundinna smitvarna og bjóða góða aðstöðu til handþvotts og hafa spritt aðgengilegt þátttakendum og skátaforingjum.
Hér geti þið lesið þær takmarkanir sem gilda hjá grunnskólabörnum.
Skátasumarið Úlfljótsvatni 2021 - Landsmót skáta
Skátasumarið Úlfljótsvatni 2021 - Landsmót skáta
Sumarið 2021 verða haldin 3 skátamót á Úlfljótsvatni í stað hins almenna Landsmóts. Ástæðan er sú að þrátt fyrir að bóluefni verði komið til landsins þá teljum við óábyrgt að skipuleggja og halda svo stóran viðburð á Úlfljótsvatni á þessum tíma.
Hugmyndin er sú að skátafélögum verði skipt í 3 hópa og mæti þau með alla sína skáta á Úlfljótsvatn á 5 daga skátamót þar sem áherslan verður lögð á útilíf, tjaldbúðarlíf og heimsmarkmið Sameinuðu þjóðanna. Þannig væru um 100 þátttakendur á svæðinu á hverju móti.
Mikilvægt er að félögin mæti með sína ungu skáta á þessi mót því lítið hefur verið um útilegur í vetur og við vitum öll hversu mikið útilífið og útilegurnar gefa okkur.
Mótsstjórar
BÍS hefur fengið til liðs við sig þrjá öfluga mótsstjóra. Þetta eru ungir og öflugir skátar, sem muna nú sanka að sér fleiri skátum til að takast á við verkefnið. Mótsstjórnin mun fá aðstöðu í Skátamiðstöðinni til að vinna að verkefninu.
Rafnar Friðriksson
Ragnheiður Silja Kristjánsdóttir
Hrafnkell Úlfur Ragnarsson
Dagsetningar
7.-11. júlí
14.-18. júlí
21.-25. júlí
Mótssvæðið
Úlfljótsvatn er tilbúið að taka við þessum fjölda á skátamót án þess fara í uppbyggingu eða breytingar á svæðinu.
Tjaldsvæði fyrir almenning væri lokað á þessum tíma.
Matarmál
Farið verði til baka í matarúthlutun og skátafélögin sjái sjálf um morgunmat, hádegismat og kaffi. Mótið verði svo með kvöldmatin.
Skátafundir grunnskólabarna frá 1. janúar
Skátafundir grunnskólabarna eftir 1. janúar
Frá 1. janúar taka nýjar reglur um æskulýðsstarf gildi. Þær eru nokkuð líkar þeim reglum sem giltu fyrir áramót en þó ögn víðari. Skátafélög skulu hátta skátastarfi samkvæmt þessum leiðbeiningum.
Þátttakendur:
- Drekaskátar, Fálkaskátar og Dróttskátar mega vera 50 saman á skátafundi og eru undanþegin grímuskyldu og nálægðartakmörkunum.
- Blöndun er leyfileg á milli hópa.
Staðsetning skátafunda:
Sé þess kostur skal skátastarf fara fram utandyra. Fari starf fram innanhúss skal gæta góðra þrifa á almennum snertiflötum og loftræsa rými. Áfram skal gæta persónubundinna smitvarna og bjóða góða aðstöðu til handþvotts og hafa spritt aðgengilegt þátttakendum og skátaforingjum.
Ráðstafanir skulu gerðar til að sótthreinsa rými eftir hvern dag og á milli hópa.
Skátaforingjar:
Skátaforingjar skulu að hámarki vera 10 á skátafundum, þeim ber að gæta 2 metra fjarlægðar frá hvoru öðru og þátttakendum en bera grímu ef ekki er unnt að tryggja nálægðartakmörk. Mælst er til þess að skátaforingjar allra aldursbila beri andlitsgrímur öllum stundum á meðan að skátafundir standa yfir. Ef skátafélög hafa starfsmann gilda sömu reglur um viðkomandi og skátaforingja á skátafundum.
Forráðamenn og aðstandendur:
Forráðamenn og aðstandendur þátttakenda skulu ekki koma inn í skátaheimili eða á skátafundi nema brýna nauðsyn beri til en þá skulu þau vera með andlitsgrímu. Um foreldra og aðstandendur sem leiðbeina á skátafundum gilda að sjálfsögðu sömu reglur og um skátaforingja.
Aðrir aðilar:
Öll umferð annarra en skátaforingja og þátttakenda skal bönnuð á svæði skátafélagsins meðan skátafundir standa yfir nema brýna nauðsyn beri til en þá er grímuskylda.
Hvert skátafélag er í ólíkri stöðu og því bendum við þátttakendum og aðstandendum þeirra á að upplýsingar um hvernig framhaldi starfsins verður háttað mun koma beint frá skátafélaginu.