Ræktun, hekl/prjón og fata viðhald

25. maí verður ræktun, hekl/prjón og smávægilegar bætur á fatnaði. Opið hús fyrir öll ungmenni í Hraunbæ 123 frá klukkan 18:00-21:00.

Áhersla verður lögð á sjálfbærni og gefa þátttakendum skilning á hvaðan maturinn okkar kemur. Til að ná því markmiði munum við bjóða upp á allskonar grænmetisræktun, kryddjurtir og blóm á byrjendastigi. Þátttakendur munu planta fræjunum á staðnum og fá svo að taka þau með sér heim með upplýsingum um hvernig á að hugsa um plöntuna.

Auk þess viljum við gefa þátttakendum tækifæri á að prjóna eða hekla tuskur í góðum félagsskap og í leiðinni fræða þau um þau áhrif sem örtrefjatuskur hafa á umhverfið, en þegar örtrefjatuska er skoluð renna litlar plastagnir í sjóinn sem ekki margir átta sig á.

Mikil vitundarvakning er í samfélaginu í tengslum við hraða tísku (e. fast fashion) og því er fólk að átta sig á því að ekki er alltaf þörf á nýjum fatnaði heldur er hægt að gera við gamlar flíkur og lengja líftíma þeirra! Því munum við einnig bjóða upp á svæði þar sem þátttakendur mæta með flíkur sem þarf að gera við og verður hægt að fá aðstoð við að gera við fatnaðinn.

Þessi viðburður er styrktur af Erasmus+ og Eurodesk Iceland