Skátaþing fer með æðstu stjórn í málefnum Bandalags íslenskra skáta, en þeirra á milli kemur sjö skáta stjórn BÍS fram fyrir hönd íslenskra skáta gagnvart einstaklingum, lögaðilum og ríkisvaldi í sameiginlegum málefnum hreyfingarinnar.

Meðal helstu verkefna stjórnar eru félagsmál, námskeiða- og viðburðahald, samskipti við alþjóðasamtök skáta, markaðsmál og stefna samtakanna. Stjórn hefur heimild til að setja reglugerðir um vissa þætti skátastarfs og að skipa ráðgjafa, nefndir og vinnuhópa sér til aðstoðar við verkefni sem stjórn fæst við eða telur brýnt að sinna.

Öllum skátum er heimilt að bera erindi undir stjórn Bandalags íslenskra skáta, og er þessi heimild lögfest í 21. grein laga BÍS. Hafir þú erindi sem þú vilt bera undir stjórn BÍS getur þú fylgt þessum slóða.

Hlutverk alþjóðaráðs er að stuðla að því að BÍS fylgi stefnum og nýti sér stuðningsefni frá alþjóðarsamtökum skáta, WOSM og WAGGGS, ásamt því að annast samskipti við erlend skátabandalög, kynningu á erlendu skátastarfi á Íslandi og íslensku skátastarfi erlendis.

Hlutverk stjórnar Skátaskólans er að stuðla að þjálfun með skipulagningu námskeiða, er taki mið af Grunngildum Bandalags íslenskra skáta.

Hlutverk starfsráðs er að styðja við og efla starf skátafélaganna í samráði við stjórnir skátafélaga, sveitarforingja og flokksforingja.

Hlutverk ungmennaráðs er að hvetja til og auka ungmennalýðræði innan stjórnkerfis hreyfingarinnar og stuðla að virkri þátttöku ungmenna við stefnumótun dagskrár hreyfingarinnar og eigin skátastarfs.

Hlutverk útilífsráðs er að hvetja til viðburða sem fela í sér útilífs og styðja við þá útilífsviðburði sem bæði skátafélög og BÍS standa fyrir.