Hamrar
Landsmót skáta
Bandalag íslenskra skáta býður skátum um allan heim á Landsmót sumarið 2026. Landsmótið verður haldið dagana
20. – 26. júlí og verður þemað “á norðurslóð”. Komið með og upplifið ævintýrin í heillandi umhverfi Hamra.
Landsmót er fyrir skáta á aldrinum 10 – 17 ára. Landsmótið er uppskeruhátíð skáta, við bjóðum til okkar erlendum þátttakendum og erum saman í vikutíma. Á Landsmóti skáta koma saman rúmlega 2- 3000 skátar frá um 20 þjóðlöndum.
Á Landsmóti skáta skapast sannkallaður ævintýraheimur. Á mótssvæðinu byggir hvert félag upp tjaldbúð þar sem skátarnir búa í vikutíma. Það reynir á skátana og mörg fara út fyrir þægindarammann sinn þegar þau fara í fyrsta sinn á skátamót og dvelja í tjaldi með öðrum. Skátarnir fá tækifæri til að kynnast ólíkum einstaklingum og mynda ný vinatengsl. Skátamót eru ein af lykilstoðum skátastarfs því þar gefst okkur kostur á að efla leiðtogahæfni og skapandi huga. Úti í náttúrunni getur skátinn fundið tengingu við umhverfið og eigin tilveru. Við tökumst á við krefjandi áskoranir sem styrkja sjálfstraust, ábyrgð og þekkingu okkar.
Dagskrá á Landsmóti er fjölbreytt;
Leikir
Hike
Tjaldbúðalíf
Bæjarferð
Þrautir
Kvöldvökur
Næturleikir
og margt fleira frá morgni til kvölds.
Nánari upplýsingar má nálagst á upplýsingasíðu Landsmóts.
Hausthátíð að Hömrum
Laugardaginn 17. september höldum við hausthátíð á Hömrum. Við byrjum með dagskrá fyrir skáta af yngri kynslóðinni kl. 13 þar sem boðið verður upp á báta, bíla, hoppukastala og fleira. Seinnipartinn verður dagskrá fyrir alla eldri skáta (Rekka- og Róver og eldri), St. Georgs, velunnara, starfsmenn og stjórnir Hamra og Klakks fyrr og nú, auk foreldra og forráðamanna skáta.
Nú eru liðin 22 ár frá því að við opnuðum útilífsmiðstöðina að Hömrum formlega með skátamótinu Skjótum rótum 29. júní árið 2000. Á tuttugu ára afmælisári Hamra 2020, stóð til að fagna áfanganum en vegna aðstæðna í heiminum reyndist það ómögulegt, svo nú ætlum við að hittast og fagna. Árið í ár er reyndar líka mikið tímamóta ár hjá okkur því í sumar var tjaldsvæðinu að Þórunnarstræti lokað og með haustinu lætur Tryggvi Marinósson af störfum hér að Hömrum eftir 14 ár í starfi framkvæmdastjóra og þar á undan var hann auðvitað frumkvöðullinn að uppbyggingunni hér og stýrði stjórn Hamra fram að því að hann tók við sem framkvæmdastjóri. Eins er árið í ár merkilegt fyrir þær sakir að, þann 18. ágúst 2022 varð Tryggvi sjötugur og um leið og við óskum honum til hamingju með daginn, þökkum við honum kærlega fyrir að hafa bæði fengið góða hugmynd og fylgt henni svona vel úr hlaði að hún er orðin að þeim veruleika sem bæði við og gestir okkar þekkja og njóta. Það er mikil vinna sem fylgir því að gera góða hugmynd að veruleika.
Hausthátíðin að Hömrum þann 17. september er því í senn gott tækifæri til að líta um öxl og rifja upp hvað unnist hefur, gleðjast og fagna þeim áfanga sem bæði Hamrar og Tryggvi hafa náð, auk þess sem gott tækifæri gefst til að spá í hvað framtíðin ber í skauti sér. Dagskráin byggir á blandi af fræðslu og skemmtun auk þess sem í boði verða veitingar. Ekki er nauðsynlegt að taka þátt í allri dagskránni en okkur þætti gaman að sjá sem flesta og þó það sé ekki nein skráningarskylda verður viðburður vegna þessa settur á samfélagsmiðilinn Facebook þar sem hægt verður að tilkynna um komu sína.
Dagskrá
13:00 ,,Skjótum rótum”, leikjadagkrá fyrir yngri kynslóðina
16:00 ,,Byggjum brú”, gróðursetning
17:00 ,,Áfram veginn”, útsýnis- og fræðsluferð um svæðið
18:00 ,,Álfar og tröll”, Sögustund og framtíðarsýn
19:00 ,,Hönd í hönd”, Grillveisla
20:30 ,,Á víkingaslóð”, Kvöldvaka
22:30 ,,Í tak við tímann”, Kvöldkaffi
23:30 ,,Nýtt upphaf”, haldið heim á leið
Hlökkum til að sjá sem flesta
Fh. stjórnar Hamra
Ásgeir Hreiðarsson
asgeir@hamrar.is
8614611
