Vonandi verðum við hér aftur eftir 50 ár með enn stærra mót
Fyrir 50 árum síðan, árið 1974, var Landsmót skáta í fyrsta skipti haldið á Úlfljótsvatni dagana 14. - 21. júlí, en áður höfðu þau verið haldin víðsvegar um landið. Mótsstjóri var Bergur Jónsson, verkfræðingur. Þema mótsins var "Landnámið" og var öll dagskrá byggð á því þema. Hvert skátafélag valdi sér landnámsmann og voru tjaldbúðirnar skírðar eftir fornum höfuðbólum í heimahéraði hvers félags. Um 1700 íslenskir skátar ásamt 200 erlendum skátum tóku þátt í mótinu en einnig voru um 100 skátar frá Danmörku og Frakklandi sem komu í tvo daga.
Dagskráin var fjölbreytt og skemmtileg. Sem dæmi um dagskrá má nefna samfélagsverkefni þar sem skátarnir fegruðu nærumhverfi sitt, einnig var markaðstorg þar sem hægt var að skiptast á merkjum, klútum, bókum og fleiru. Sett var upp tívolí með skemmtilegri afþreyingu en þar var hægt að prófa bogfimi og stultur. Heimsóknardagur var svo þann 20. júlí en þá var öllum sem vildu boðið í heimsókn á mótið.
Gamla kirkjuklukkan úr Landakotskirkju var flutt á Úlfljótsvatn fyrir mótið og komið fyrir á stórri járngrind og er hún hér enn í dag á glænýrri grind.
Það er gleðilegt að halda Landsmót hér á Úlfljótsvatni aftur 50 árum seinna með svipuðum fjölda skáta. Vonandi verðum við hér aftur eftir 50 ár með enn stærra mót.
Hressir skátar í sjónvarpsviðtali
Hressir skátar úr skátafélaginu Skjöldungum voru í viðtali í kvöldfréttum RÚV þann 12. júlí þegar setningarathöfn var nýlega lokið. Endilega kíkið á viðtalið sem hefst á mínútu 18:50 í hlekknum hér.
Skátablaðið Pappírsheimur - 2. tölublað
Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 2. tölublað.
Mótssöngurinn er kominn á netið!
Mótssöngur Landsmótsskáta er nú kominn á netið, og er á leiðinni inn á YouTube, Gítargrip og fleiri vettvanga. Mótssöngurinn er saminn af þeim Degi Sverrissyni og Högna Gylfasyni og textann sömdu Inga Auðbjörg K. Straumland og Jökull Jónsson. Jökull gerði svo undirspilið og fékk Ragnheiði Silju Kristjánsdóttur til að syngja lagið inn. Lagið fjallar um það hvernig við getum tekið höndum saman til að sigrast á erfiðleikum okkar og sundrung.
Mótssöngur Landsmóts skáta 2024
Hlaða niður MP3 // Gítargrip.is
Hlaða niður MP3 // Gítargrip.is
Úr alls konar áttum
Lag: Dagur Sverrisson og Högni Gylfason
Texti: Inga Auðbjörg K. Straumland og Jökull Jónsson
Einn daginn opnuðust öll hlið
Hittumst við
Vináttan var velkomin
Í fjölbreytni okkar fundum við
Loksins frið
Sambúðin var fullkomin
Úr alls konar áttum,
Og misjöfn í háttum
Svo ólík að utan,
Að innan við við erum eins
Ég finn hvernig kallað er á mig
Hvað með þig?
Togar í mig innan frá
Vegferðin okkar hún hefst hér
Hér hjá mér
Hugrökk munum markinu ná
Úr alls konar áttum,
Og misjöfn í háttum
Svo ólík að utan,
Að innan við erum eins
Bergheimur: Við bjóðum allan okkar mátt!
Loftheimur: Við fljúgum frjáls um loftið blátt!
Eldheimur: Í okkur bálið brennur dátt!
Vatnaheimur: Vatnsflauminn fangað fær svo fátt!
Jurtaheimur: Við græðum sárin ósjálfrátt!
Syngjum hátt!
Svo ólík, samt í fullri sátt!
Upp á gátt!
Fjölbreytileikinn færir fjöll
Hlustið öll,
Komið saman, allt um kring!
Saman við sigrum þessa vá,
Innan frá
Svarið það er sameining
Úr alls konar áttum,
Og misjöfn í háttum
Svo ólík að utan,
Að innan við erum eins
Alveg eins!
Úr alls konar áttum,
Og misjöfn í háttum
Svo ólík að utan,
Að innan erum eins
Alveg eins
We’re the same
Melody: Dagur Sverrisson and Högni Gylfason
Lyrics: Inga Auðbjörg K. Straumland and Jökull Jónsson
Way back, when our discovery
Set us free
Leading us to live this way,
For ages, we lived in harmony,
happily,
Side by side, day by day
Progress, and portals
On parallel planets
Our worlds might be different
But inside, we’re the same
You hear how it’s calling you and me,
Quietly,
Urging us to find the cause
Equipped by our hope and bravery,
You and me,
Greatest force that ever was!
Progress, and portals
On parallel planets
Our worlds might be different
But inside, we’re the same
Lava World: Our strength is our strategy!
Air World: We won’t be tamed by gravity!
Fire World: Our flames are forged from energy!
Water World: And underwater we are free!
Plant World: Bring evil down with botany!
One two three!
Our gift is our diversity!
Jamboree
Only in solidarity
We’ll be free
Take my hand and join the fight
Our triumph is our destiny,
Dream with me,
Together our future is bright
Progress, and portals
On parallel planets
Our worlds might be different
But inside, we’re the same
We’re the same!
Progress, and portals
On parallel planets
Our worlds might be different
But inside, we’re the same
We’re the same
Lausnamiðun og hjálpsemi á fyrsta degi mótsins
Það rigndi vel á okkur á fyrsta degi Landsmóts. Skátarnir létu það þó ekki á sig fá og komu upp tjaldbúðum, elduðu mat og skemmtu sér vel. Þegar líða fór á kvöldið bætti þó heldur í rigninguna, stórir pollar mynduðust á tjaldflötunum og sum tjöld fóru á flot. Þar sem skátar eru einkar lausnamiðaðir og hjálpsamir voru því öll stærri tjöld nýtt til þurrkunar á minni tjöldum og öðrum búnaði. Brugðið var á það ráð að moka litla skurði sem stýrðu vatninu frá tjaldflötunum.
Annar dagur mótsins hófst svo í dag með fjölbreyttri dagskrá t.d. var opin dagskrá þar sem hægt var að fara í klifurturninn, taka þátt í fótboltamóti, heimsækja Gilwell skálann, Skátasafnið og margt margt fleira.
Eftir hádegismat fóru skátarnir í torgadagskrá sem verður í boði fjóra daga á mótinu og allir skátar fara á öll torgin. Torgin eru fjögur. Á göngutorg er hægt að velja um ýmsar gönguleiðir í kringum Úlfljótsvatn og nágrenni. Á samfélagstorgi er hægt að vinna verkefni sem miða að því að fegra og betrumbæta umhverfi Úlfljótvatns. Á sköpunartorgi er ýmis efniviður og þar fær ímyndunaraflið að njóta sín. Og á þrauta-og metatorgi var hægt að fara í vatnasafarí, byggja fleka, keppa í sápubolta og margt fleira.
Um kvöldið var svo skátaáskorunin en það eru 100 þrautir um allt svæðið sem hvert skátafélag þurfti að leysa í sameiningu. Sem dæmi um þrautir og verkefni sem þufti að leysa var að raða sér í afmælisröð án þess að tala saman, fylla vatnsbrúsa með rigningarvatni og bera kennsl á 10 fána á svæðinu. Skátaáskorunin einkenndist af gleði, fjöri, rigningu og samvinnu.
Landsmót er formlega sett!
Landsmót skáta var formlega sett í gærkvöld en skátafélögin og flokkarnir gengu í fylkingum að sviðinu þar sem setningarathöfn fór fram.
Setningarathöfnin var skemmtileg og lífleg þrátt fyrir mikla rigningu, sungnir voru hreyfisöngvar, mótsstýra, Kolbrún Ósk Pétursdóttir, ávarpaði þátttakendur og að lokum var mótslagið "Úr alls konar áttum" sungið.
Hlustaðu á Fm Landsmót skáta
Á Landsmóti skáta verður starfrækt útvarp. Hægt er að hlusta á útvarpið hér eða stilla á 106.1
Dagskráin verður fjölbreytt en sem dæmi verða viðtöl við allskonar skáta, tónlist, viðtöl við skáta í dagskrá og svo er ungum skátum boðið að stjórna sínum eigin útvarpsþætti.
Útvarpsstjórar eru Helena Sif Gunnarsdóttir, Ísak Árni Eiríksson Hjartar og Óli Björn Sigurðsson.
Það er því tilvalið fyrir öll að hlusta, hvort sem þau eru á Landsmóti eða ekki.
Skátablaðið Pappírsheimur - 1. tölublað
Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 1. tölublað.
Skátar streyma að
Landsmót skáta er að hefjast og skátar allstaðar að úr heiminum hafa streymt á svæðið frá því á mánudag. Öll íslensku skátafélögin og fleiri erlendir skátar setja upp tjaldbúðir sínar á svæðinu í dag. Eftirvæntingin leynir sér ekki á mótsvæðinu á Úlfljótsvatni, enda hafa liðið átta ár frá síðasta Landsmóti skáta.
Mikil gleði ríkir á svæðinu þrátt fyrir hressilega rigningu og fagna skátarnir því að geta prófað allan búnaðinn sinn á mótinu. Samkvæmt veðurspá styttir upp skömmu eftir helgi.
Á mótið koma um 2000 skátar, t.d. frá Kanada, Hong Kong, Tavían, Evrópu og Bandaríkjunum.
„Það er erfitt að útskýra fyrir þeim sem hafa ekki mætt á Landsmót hvað það er, því þetta er meira en bara útilega. Skátaandinn sem svífur yfir svæðið og samheldnin sem er til staðar í skátasamfélaginu okkar er einstök og býr til þessa fallegu stemmningu sem einkennir Landsmót“.
- Kolbrún Ósk Pétursdóttir, mótsstýra Landsmóts skáta
Mótið verður sett í kvöld kl 20:00 með glæsilegri setningarathöfn.
Það er spennandi og skemmtileg vika framundan þar sem við hittum skáta allsstaðar að úr heiminum og byggjum upp stórt alþjóðlegt skátasamfélag. Fimmtudaginn 18. júlí bjóðum við öllum áhugasömum að koma í heimsókn. Hægt verður að rölta um allt svæðið og kynnast ólíkum menningarheimum skáta frá mismunandi löndum. Deginum lýkur með hátíðarkvöldvöku. Við hvetjum öll til þess að taka daginn frá og gleðjast með okkur á Úlfljótsvatni.
Hægt verður að fylgjast með Landsmótinu á heimasíðu og samfélagsmiðlum skátanna, Facebook og Instagram. Gefið verður út daglegt fréttablað frá Landsmóti og að auki hægt að fylgjast með því í útvarpi á rásinni 106.1 eða á spilarinn.is
Landsmót hefst á morgun!
Landsmót skáta verður haldið 12. – 19. júlí á Útilífsmiðstöð skáta á Úlfljótsvatni. Skátar fagna því að geta aftur komið saman eftir 8 ára hlé, en fella þurfti síðasta mót niður vegna Covid 19. Á landsmótum skáta er samheldni, gleði og skátaandinn í fyrirrúmi.
Þema landsmóts í ár er „Ólíkir heimar“ sem vísar til þess að á landsmóti eru ekki bara íslenskir skátar heldur koma skátar alls staðar að úr heiminum, enda er skátahreyfing stærsta æskulýðs- og friðarhreyfing í heimi. Skátarnir koma frá ólíkum löndum, hafa ólíkan menningarbakgrunn og tala ólík tungumál en eiga það öll sameiginlegt að vera skátar.
Landsmót skáta stendur yfir í viku, og er gist í tjöldum. Tjaldbúðirnar sem rísa munu rúma yfir 2000 skáta og fjölskyldur þeirra, og á örfáum dögum rís nýtt bæjarfélag skáta á Úlfljótsvatni. Dagskráin er fjölbreytt og skemmtileg þar sem öll ættu því að geta fundið eitthvað við sitt hæfi, reynt við nýjar áskoranir og á sama tíma eignast nýja vini. Dæmi um dagskrá eru hike-gönguferðir, sköpunarsmiðjur, bogfimi, klifur og stór þrautasvæði. Stór hluti skátastarfs byggir á þjónustu við samfélagið og munu því allir skátar mótsins taka þátt í því að bæta heiminn í einn dag, og vinna verkefni sem byggja upp miðstöðina á Úlfljótsvatni.
Sérstakar fjölskyldubúðir verða starfræktar á mótinu þar sem fjölskyldur þátttakenda, eldri skátar og fjölskyldur þeirra og þau sem eru áhugasöm um að kynnast skátastarfi stendur til boði að tjalda saman og taka þátt í mótinu. Dagskráin er sérstaklega miðuð að yngri kynslóðinni og fá þau meðal annars að fara í bátasmiðju, útieldun, á kvöldvöku og margt fleira.
Á heimsóknardegi þann 18. júlí geta þau sem vilja komið í heimsókn á mótið og tekið þátt í dagskrá, rölt um svæðið og kynnst skátafélögunum sem mörg hver verða með kynningar, leiki og fleira. Einnig er hægt að kíkja á kaffihúsið í Strýtunni og fá sér kaffi og vöfflur eða versla í Skátabúðinni og enda svo daginn á hátíðarkvöldvöku.