Nú fjölgum við í hópi sveitarforingja

Vinnuhópur um fjölgun sveitarforingja í skátastarfi verður stofnaður í ársbyrjun 2021 og er það í samræmi við nýlega samþykkta stefnu skátahreyfingarinnar.

„Markmið skátanna er að styrkja foringjahóp og bakland hreyfingarinnar með því að virkja óvirka skáta, fjölga nýliðum og minnka brottfall. BÍS leggur áherslu á að styðja félög til vaxtar á þeirra forsendum,“ segir í stefnunni sem samþykkt var á skátaþingi í haust.

Viltu taka þátt?

Stjórn BÍS leitar að sjálfboðaliðum í vinnuhóp um fjölgun skátaforingja í skátastarfi. Gert er ráð fyrir 3 – 5 manna hópi þar sem brennandi áhugi og/eða reynsla fá að njóta sín. Með vinnuhópnum verður tengiliður við stjórn og Skátamiðstöð. Tekið verður við umsóknum frá einstaklingum og teymum.

Láttu vita af þínum áhuga með pósti á veramemm@skatar.is fyrir 7.janúar. Nánari upplýsingar veitir Marta Magnúsdóttir skátahöfðingi.  Gjarnan má senda kynningarbréf þar sem líst er áhuga og reynslu þátttakanda. Á vef áttavitans eru hagnýt ráð hvernig kynningarbréf getur litið út – skoða fyrirmynd að kynningarbréfi.

Öllum umsóknum verður svarað.

Skuldbindingin sem þú brennur fyrir!

Þau sem senda umsókn skuldbinda sig til vinnu í hópnum frá 10. janúar – 15. maí 2021.

Vinna hópsins verður í samræmi við markmið stefnu BÍS, en eins og áður segir vilja skátarnir styrkja foringjahóp og bakland hreyfingarinnar með því að virkja óvirka skáta, fjölga nýliðum og minnka brottfall. Í stefnunni segir einnig að  fyrir lok árs 2025 eigi þessi markmið að hafa náðst til að veita fleiri börnum og ungmennum kost á að stunda uppbyggilegt skátastarf. Verkefni vinnuhópsins er að leggja til aðgerðir til að þessi markmið náist.

Stuðningur við skátafélögin á þeirra forsendum

Mikilvægt verður í starfi vinnuhópsins að eiga samtal við skátafélögin, en það er í stefnunni lögð áhersla á að styðja skátafélögin til vaxtar á þeirra forsendum. Gert er ráð fyrir í stefnunni sem samþykkt var á skátaþingi af öllum skátafélögum að hvert félag setji sér markmið og mælikvarða um eftirfarandi atriði:

  • fjölgun foringja
  • fjölgun virkra sjálfboðaliða í félaginu
  • fjölgun skáta
  • minnkun brottfalls

Skátafélögin eiga að fá til þess viðeigandi stuðning frá BÍS og mun vinnuhópurinn skýra í hverju sá stuðningur kemur sér best fyrir félögin.

Vinnuhópurinn á að leggja til fyrirkomulag og áfangaskiptingu þannig að fyrir lok árs 2025 verði búið að útfæra leiðir til þess að:

  • fjölga foringjum
  • fjölga virkum sjálfboðaliðum í félaginu
  • fjölga skátum
  • minnka brottfall milli aldursbila

Vinnuhópur skili af sér til stjórnar BÍS í síðasta lagi um miðjan maí 2021 heildarskipulagi fyrir verkefnið og hugmyndum að næstu skrefum varðandi framkvæmd þess. Gjarnan mega fylgja tillögur um fræðsluefni fyrir skátaforingja og skáta, sem og verkefnapakkar fyrir skátasveitir.

Skreytimynd-fjölgun sveitarforingja